以西结书 46章1节 到 46章24节   背景资料  上一笔  下一笔
Chit章经文是继续前一章有关君王参与祭典ê各项规矩。Mā koh一pái提起有关君王ê土地,传承hō͘家己ê子女,kah赏赐hō͘臣仆无相仝;hō͘子女ê ē-tàng继续传承落去,m̄-koh hō͘臣仆ê,只要臣仆往生,就收回归王室所有。并且提起祭司使用灶脚ê时应该遵守ê规矩。

第1节,「tī六个工作日内」是表示不包含安息日在内。「内院ê东门一定tio̍h关闭」,原因只有君王chiah thang tùi东门(正门ê意思)进入。Chia讲「安息日kah初一,东门tio̍hphah开」。因为chit-ê时间君王beh进入,所以一定tio̍h phah开东门。

第2节,「当祭司为君王献烧化祭」,表示君王beh代表人民献祭,是ná亲像今á日ê主祭官仝款。M̄-koh chia由祭司主持仪式。

Tio̍h注意ê是君王tio̍h「khiā tī门柱边á」,意思是teh指君王只有ē-tàng进入来内院ê门边,无法度进入内院。因为内院只有祭司kah利未人thang进入。

第3节,「安息日kah初一」hō͘人看做是siōng重要ê日子,因为án-ne,全国人民lóng tio̍h敬拜上帝。

第4到5节,chit两节详细记载君王tī「安息日」应该「beh向上主」献祭ê物件。

第6到7节,这是关系「初一」tio̍h献祭ê物件。

第8节,chit节kah第2节所提ê仝款,koh一pái讲tio̍h君王á是领袖teh代表人民,因为án-ne,伊thang tùi东门进入。

第9节,chia就真清楚讲tio̍h:因为节期民众真chē,为tio̍h beh维持圣殿献祭活动路线ê秩序,就规定进出圣殿ê时采南北门相对为动线,就án-ne门进,就tio̍h tùi另外一门出去!

第10节,「人民入来ê时chūn,王mā tio̍h入来」,意思是teh指非节期ê时,若是君王mā tio̍h kah一般人民仝款是tùi南门á是北门进入,tùi相对ê门出去。

第11节,chit节是teh指特别节期ê献祭,需要注意献牲祭ê时,lóng需要配搭「十七公升半ê素祭」kah「三公升ê橄榄油」同时献上。

第12节,chia提起王beh进入内院献祭ê时,thang kah安息日仝款,请人替伊开东门,m̄-koh伊一离开,东门就马上「关密」。

所谓「自愿祭」,是teh指「还愿」ê祭(参考利未记七:16、廿二:18—22)。

第13到15节,「每工早起」,tio̍h准备「无残缺ê一只一岁ê小羊做烧化祭hō͘上主」,iáu koh khah搭配「两公升面粉kah一公升橄榄油」ê素祭。Chit种献祭是「永久有效」,因为án-ne,「bē-tàng间断」。

第16节,若是君王处理家己ê土地hō͘子女,得tio̍h分配ê人就ē-tàng永远得tio̍h hit种产业。这是为tio̍h beh落实第四十五章7到8节ê规定,hō͘君王无贪婪ê心思意念。

第17节,若是君王kā土地「赐hō͘臣仆」,chit种赏赐是「暂时」拥有。等到「归还年」就beh归还hō͘国王。这「归还年」有两种意思,一是teh指安息年,mā就是每一个第七年。换句话讲,领受tio̍h土地ê臣仆只有七年ê所有权(参考申命记十五:12)。另外一个意思,是teh指利未记第廿五章10节所提起ê五十禧年。Chiah-ê tùi奖赏领受tio̍h ê土地,lóng tio̍h归还hō͘「王族」,这是因为只有「王kah王子thang永久拥有这土地」。 
第18节,仝款规定王族ê人bē-tàng「侵占人民ê产业」,王族ê人只有ē-tàng使用家己家族ê产业,án-ne就ē-tàng「免得伊欺压人民」,致使「侵占」上帝子民ê「土地」。

第19到20节,这是说明祭司tī使用ê房间,特别分别出来「是圣ê」。有两个地方,一处tī「南边」,另外一处tī「西边」。这两个所在,lóng是隐密ê,就ē-tàng避免「伤害人民」,原因献祭后ê物件,iáu hō͘人看做是神圣ê物。「chit-ê所在是hō͘祭司煮赎罪祭á是赎过祭ê肉用ê,mā是烘素祭用ê」,就kah灶脚仝款,tī chit所在煮食,mā tī chit所在食用。这mā thang防止献祭ê物件流落到外面去。

第21到22节,这是利未人thang活动ê所在,特别是tī「外院ê四个角落」lóng有利未人活动ê「小庭园」,这小庭园「长二十公尺,阔十五公尺」。

第23到24节,tī每一个庭园「靠tio̍h石墙」有「炉á」,指引先知以西结看ê hit-ê人讲,这是「灶脚」,是hō͘利未族人「tī chia煮人民所献ê祭物」,了后mā tī chia食用。

重新查询 专卷研经 以西结书系列
错误回报,请联系comm[@]fhl.net