以西结书 37章1节 到 37章28节   背景资料  上一笔  下一笔
Chit章ē-sái讲是kui卷以西结书siōng特别ê一章,谈起上帝hō͘死去ê枯骨全部苏醒起来,chit种异象ê预言,是tī回应头前一再提起过上帝beh带领四散在世界各国ê以色列人民tńg去故乡之期待(参考二十:34、廿八:25、三十四:13、16、三十六:24),对tī所有ê以色列人民来讲,这是真大ê鼓舞kah激励。Chit种应允ê背景,tú好teh说明kui本圣经一再传达ê中心信息:tī上帝手上无无法度成就ê事。因为他就是创造宇宙万物ê主宰。Chit位创造主ē-tàng tùi「无」生「有」,当然thang用已经枯干真久ê骨头,来创造新ê性命。

Chit章iáu有一个重要ê主题,就是用两条木棍来譬喻分裂ê以色列民族,上帝beh koh一pái带领in tńg去故乡重建家园,hō͘ in有机会重新复合,ná亲像hō͘两条木棍成做一条。

Chit段经文是谈起有关死去已经真久,骨头lóng已经非常枯干ê状况下,上帝用重新创造ê方式,pûn气进入chiah-ê骨骸,hō͘ chiah-ê死后已经埋葬tī坟墓里ê尸体koh活起来,成做ē-tàng保国卫民ê军队,tī家己家园ê土地顶面耕耘。

第1到2节,chia记载是上帝ê「灵」tī运行,这灵带领先知以西结「行遍山谷」,kui个「山谷里堆满非常枯干ê骨骸」,这是hō͘人看了就会怵目惊心ê景象。这thang联想tio̍h主前587到586年期间ê背景,当时巴比伦军队围困耶路撒冷城,城内闹饥荒严重到人食人充饥(参考耶利米书十九:9,耶利米哀歌二:20、四:10)。另外一方面,就算是ē-tàng逃出耶路撒冷城,mā会hō͘守tī城外ê巴比伦军队,á是tī城外thèng候围捕杀戮ê以东军队杀害。Á kui个山谷lóng是骨骸,就thang知影被杀害ê人数是chē到无法度估计,而用「非常枯干」一词,tú好表示死亡已经有一段真久ê时间,tī人看起来,绝对无可能有任何koh活ê希望。这mā隐喻tio̍h所有tī俘虏营中ê以色列人民对性命已经绝望到极点。

第3到6节,chit段经文是先知以西结kah上帝之间ê对话。

上帝ê灵问先知以西结,chiah-ê枯骨是m̄是「ē-tàng koh活起来」?先知以西结真清楚性命ê问题「只有」上帝chiah「知影」。

既然án-ne,上帝就beh先知以西结向chiah-ê非常枯干ê骨骸讲「预言」,表示上帝beh做ê事:一是「我beh吹做一困进lín内面,hō͘ lín koh活起来」,chit-ê「气」字,希伯来文是「ruah」,tī创世记第一章2节、第二章7节等等记载仝款ê字,这说明上帝ê灵,就是上帝ê气力,mā是性命之气。因为án-ne,当上帝ê气一吹入chiah-ê枯骨,chiah-ê原本无性命ê枯骨,就会「生筋长肉,包上一层皮」,重新出现生机。二是上帝ê气一吹,原本看起来是完全死去ê性命,就会「koh活起来」,而这是只有性命ê主宰—上帝chiah ē-tàng做到ê事。

第7到8节,当先知以西结「遵照上主ê命令讲预言」,伊忽然发现chiah-ê骨骸开始有「瑟瑟ê声音,一阵骚动,骸骨彼此连结起来」,而且是「生筋长肉,包上一层皮」,然后讲「躯体iáu未呼吸」,表示iáu未性命ê迹象出现。这真清楚说明chiah-ê原本非常枯干而且是四散分离ê骨骸,现在重新组合了起来,表示性命开始tī重整,展现了性命ê契机。

第9到10节,上帝beh先知以西结续落来「向风讲预言」,chia ê「风」一字,就是创世记第一章2节所讲上帝ê「灵」,mā是第二章7节ê「气」字。当伊遵照式样ê命令对风讲预言后,果然有「tùi四面八方吹来,pûn入去chiah-ê躯体」,chiah-ê「躯体就活起来,khiā立起来」,而且koh khah特别ê是,chiah-ê活起来而且khiā立起来ê人,数目「够额编成军队」,mā表示chiah-ê koh活ê人,m̄是亲像破病tú复原ê人,却是亲像thang马上赴战场ê精兵仝款壮硕。

第11到14节,chit段经文讲出以色列人民ná亲像头前所叙述ê满山满坑ê尸体,而且是非常枯干ê骸骨仝款,对kui个民族ê性命已经不存任何希望à。M̄-koh现在一切lóng 会改变,因为上帝伸出了他怜悯ê手。上帝讲beh「phah开」死亡ê「坟墓」,kā in「带出来」,领in tńg来到「以色列本土」。M̄-nā án-ne,in无koh ná亲像埋葬tī坟墓里已经死去ê人,却是「活起来」有上帝「活气pûn入去」in原本已经死去ê身躯,in就án-ne重新得力,而且体验出chit位pûn气tī in身躯、赏赐kā in赐福新性命ê就是主上帝。

第15到19节,chit段经文是上帝beh先知以西结the̍h「两条木棍握tī手里」做象徵性ê譬喻预言。Tī这两条木棍中,其中有一条Tī顶面写「犹大王国」,另一条顶面写「以色列王国」,然后kā这两条木棍「两头相接,当做一条木棍」。这teh说明以色列tī所罗门死后分裂做做南北两国,现在beh接起来,表示重新复kah成一个国家。其实,早tī先知运动中就有过chit种呼吁(参考何西阿书一:10—11,以赛亚书十一:12—13,耶利米书三:18、三十:1—3)。上帝beh先知回覆hiah-ê来询问chit-ê木棍譬喻ê同胞,tī上帝手中,以色列民族无南北二国之分,表示上帝beh拯救ê是kui个以色列民族。

第20到22节,chit段经文真清楚表示上帝beh先知以西结kā「两条木棍握tī手里」,hō͘以色列人民清楚看见,上帝决定tùi四散到世界各地ê以色列人民,kā in带tńg来故乡「本土」。然后ài kā in「组成一个国家」、「由一个君王来统治」、「无koh分裂为两国」,这lóng teh表示tio̍h上帝ê应允to̍h是会实现,ná亲像两条断裂ê木棍,kā重新组合做伙。

第23节,chit节讲tio̍h几个重要ê动作:

一是,tńg去故乡ê以色列人民「无koh拜thang憎恶ê偶像玷污家己」,换句话讲,in会对上帝忠实,专心敬拜上帝。

二是tī社会生活上「无koh腐败犯罪」。过去滥刣无辜、欺压弱势者等罪行,以后be7 koh出现。

三是上帝beh亲自「洗净in」,表示上帝beh用清洁ê水洗荡、雾in,洗掉in身上ê污秽。

四是上帝beh koh一pái宣告kah以色列人民ê约:「in beh做我ê子民;我beh做in ê上帝」。

第24到25节,chit节回应了第三十四章11到15节所预言ê,上帝beh拣选一位「像大卫ê君王出现」,这是因为大卫王hō͘人认为是上帝ê仆人(参考撒母耳记下三:18、七:8、列王记下八:19、十九:34,以赛亚书十一:1、10、三十七:35)。Tī上帝眼中,大卫ná亲像好ê「牧者」仝款,会照顾上帝ê子民,而且会带领chit群上帝ê子民「诚心遵行」上帝ê「律法」。而且chit位君王是会带领人民永远tòa tī上帝赏赐kā in赐福祖先「tòa过ê土地」上。

第26到28节,chit两节koh一pái提起上帝kah以色列人民ê约外,mā用「同in tòa tī hia」chit句话来表示上帝以后be7 koh kah in分离。上帝会赐福kā in赐福,hō͘ in「人口增chē」,会「永享太平」,而且有上帝ê「圣殿永远屹立tī in ê土地顶面」,这teh表示以色列人民代代kiáⁿ孙lóng会以敬拜上帝为荣誉。Chit时chūn,所有「列国就知影」,上帝已经tńg来到了以色列人民中间,「拣选以色列人民」做他ê子民。

重新查询 专卷研经 以西结书系列
错误回报,请联系comm[@]fhl.net