Chit章是继续tùi第廿九章开始ê谈起有关上帝beh惩罚埃及之记事。Tī这章中提起两个时间，一是第1节，二是第17节。Á tī chit两段时间lóng是耶路撒冷沦陷后ê时间，表示犹大亡国à。

Chit段经文koh一pái tńg来到了第廿九章3到5节所提起尼罗河kah河里ê怪物。Beh表明ê就是：埃及就是尼罗河中ê hit只怪物，上帝beh用siōng严厉ê方式来处置chit只河中ê怪物。

第1节，上帝hō͘先知以西结ê信息，时间是tī「流亡ê第十二年十二月初一」，这是主前585年3月3日。

第2节，上帝beh先知以西结去「警告埃及王」，并为埃及王「作挽歌」，表示上帝惩罚埃及王ê时间到à。Chia讲埃及王家己认为是「少壮狮」，表到真勇猛、威严，m̄-koh tī上帝眼中，埃及王只不过亲像一个「河里ê鳄鱼」，siōng chē是「tī河里泼水，用脚搅混河里ê土，hō͘河水污浊」，kan-taⁿ会用chit种混水摸鱼ê方式，躲bih起来藏tī人看bē-tio̍h ê所在，做kóa bē看kháu得ê事。M̄-koh即使是án-ne，上帝á是真清楚知影伊teh chhòng甚么。

Chia所用ê句话mā另外有一种意思，指埃及ê外交政策，时常搅乱了kui个中东国际社会ê秩序。Á是讲它真会使弄别人去做不应该ê事，而bih tī暗处thèng候收成。

第3到8节，chit段经文描述上帝惩罚埃及ê手段：

一是「当真chē国家ê人民聚集ê时chūn」，上主「会抛网掠tiâu」它，hō͘它无法度逃脱。

二是kā它「拖到岸上」，弃saktī土脚，「hiat tī荒野，叫所有空中ê飞鸟旱地上ê行兽来食」它。

三是它ê「尸体」kā遍满kui个「山岭」、「溪谷」，而所流ê「血」差不多ē-sái讲是血流成河一般，预言死伤会真严重。

四是当上帝惩罚埃及时，天象会改变，ná亲像当年摩西带领以色列人民行出埃及chìn前所发生ê灾难仝款（参考出埃及记十：13—15、21—23）。

第9到10节，chit两节lóng teh强调上帝严厉惩罚埃及时，ē-sái真chē埃及「m̄-bat听过ê国家」，以及「群王会惊惶pi̍h-pi̍h-chhoah」，表示列国lóng会因为巴比伦军队ê凶猛、残暴之武力摧毁了埃及而惊kah gāng去到无法度khiā稳，全身pi̍h-pi̍h-chhoah，担心「性命」不保。因为担心会受tio̍h牵连，心中惊惶不安。

第11到16节，chit段经文真清楚hō͘埃及王知影，伊会「遭遇巴比伦王ê刀剑」杀害。有真chē「凶狠ê国家」会跟tòe巴比伦帝国ê军队联合起来，用真残酷ê手路「刣了了」埃及ê人民，án-ne，伊kah伊ê人民过去「所夸耀ê一切」全部lóng会跟tòe「消灭」。

Tī前面所提起ê，过去埃及王就是tī尼罗河里hō͘河水混浊，藉以杀害过河ê人kah cheng-seⁿ。Taⁿ当埃及国王kah伊ê人民lóng被消灭殆尽ê时，孕育性命ê尼罗河就ē-tàng恢复以往ê「清澈」，无koh「污浊」了，而孕育性命ê契机会重新启开。因为án-ne，字面上看起来是残酷，其实mā是上帝特别ê恩典，会有新性命ê开始。上帝beh「hō͘埃及成做废墟荒地」。这mā是上帝beh先知以西结写ê「挽歌」，用来「哀悼埃及kah伊ê国民」，m̄-nā án-ne，chit首挽歌会成做「列国ê妇女lóng tio̍h唱」ê挽歌，mā会流传落去，成做一首警戒世人ê哀歌。