以西结书 17章11节 到 17章24节   背景资料  上一笔  下一笔
Chit段经文是teh解释前段第3到10节所讲ê譬喻内容。然后用一首诗歌表示:犹大经过巴比伦ê惩罚了后,续落来是传来上帝安慰、拯救ê信息。Ná亲像头前有叙述过ê,先知文献ê特色,就是讲一段上帝受气ê谴责、惩罚,m̄-koh最后lóng是会带来鼓舞ê信息,m̄-koh chit种信息lóng有一个基本前提:悔改、归向上帝。

第11到15节,chit段经文是teh解释前段譬喻ê意义。上帝beh先知以西结问问hiah-ê「悖逆」犹大人民,问问in是m̄是明白巴比伦kā in ê国王kah「伊ê臣仆掠到巴比伦去」,然后命令西底家「宣誓效忠」,而西底家王mā确实bat「奉上帝ê名chiù-chōa忠心」,表示beh对巴比伦帝国忠心,m̄-koh结果却是违背了这誓言。Thang理解ê是巴比伦ài西底家王chiù-chōa效忠,只有一个原因,就是beh「防止国家复兴」,ài犹大永远归顺tī巴比伦帝国ê统治之下。M̄-koh「犹大王反叛了」,因为西底家并无真心顺服tī巴比伦帝国ê统治,伊á是暗中派人去kah埃及帝国串连,想利用埃及帝国来牵制巴比伦帝国。虽然先知耶利米bat警告过伊m̄-thang án-ne做,m̄-koh chit时chūn ê西底家王已经听bē落去上帝ê仆人先知所传达ê信息。

第16到18节,chit段经文是上帝对犹大国采取惩罚ê回应。上帝表示一定会照所决定ê计画去执行。就是西底家「chit-ê王一定会死tī巴比伦」,chit句话thang参考列王记下第廿五章7节。「因为巴比伦王立伊做王」,chit句话thang参考列王记下第廿四章17节。

「巴比伦王前来攻城」,这是主前587年,mā是西底家王在位ê第九年ê十月10日,围城长到一年六个月时间,mā就是到隔年ê四月。最后耶路撒冷城门开了,会phah开城门,是因为城内闹饥荒严重到hō͘人民无法度忍受ê状态,甚至父母kah隔邻交换婴á煮食来充饥(参考耶利米哀歌四:10,耶利米书十九:9)。Hit年犹大正式灭亡,时间是主前586年(参考列王记廿五:1—3)。Chia讲情况严重ná亲像进行「屠杀」仝款,连埃及想beh「派siōng精锐ê部队来mā无法度救援」,而事实是后来并无来帮助,就án-ne,犹大灭亡à。真正ê问题是在tī西底家王弃sak誓约。

第19到21节,koh一pái用上帝以他「永恒ê性命chiù-chōa」一词,chit种句话mā是以西结chit位先知不时使用ê句型,beh表明kah上帝ê约,tio̍h用性命ê态度来回应。

「因为伊弃sak指我ê名所chiù ê chōa」,这就是头前第15节所讲ê,西底家王用上帝ê名chiù-chōa却违背誓言,因为án-ne,上帝非常忿怒,决定beh「惩罚伊」。

上帝讲beh「thí开罗网」,这表示巴比伦帝国ê军队会四面围困耶路撒冷城,就算西底家王利用地道逃到城外,mā无法度脱逃,虽然伊身边有「siōng精锐ê」御林军随身庇护,m̄-koh chiah-ê军人后来lóng弃sak了伊,最后hō͘伊孤立无援而受掠(参考列王记下廿五:4—6)。

第22到24节,这是一首诗歌,表示上帝beh带hō͘苦难ê以色列民族一个全新ê希望。

「我beh at断香柏树ê尖端」,chit句话thang参考第3节,原本是teh指约雅敬被巴比伦帝国hō͘俘虏去做奴隶。M̄-koh现在chia ê「我」却是teh kí上帝家己。

「香柏树ê尖端」,表示大卫家族ê kiáⁿ孙,上帝beh kā它「拆下」来,然后重新栽种、培育,ài kā新发出来「幼嫩ê枝子」,「种tī高山顶」。Chia ê「高山」是teh指耶路撒冷。

「茁壮生长,结果子」,表示上帝亲自灌ak、看顾、守护,就算siōng脆弱ê性命,mā会koh一pái得tio̍h性命ê气力。

「各种鸟á飞来做巢,tī树荫下chhōe归宿」,chit种句话表明以色列会重新成做一个强盛ê国家,chit种预言ná亲像先知以赛亚所预言仝款(参考以赛亚书五十五:4—5),而chit-ê前提,就是以色列人民会确实听从上帝ê话、悔改,归向上帝。

Chit首诗歌讲出一个基本信仰认知:骄傲,kā会hō͘人弃sak上帝ê赐福,而上帝看顾卑微、敬畏他ê人。他扶持弱小、谦卑ê子民。这mā是耶稣降生ê时,马利亚ê诗歌中mā清楚讲出了chit-ê信息(参考路加福音一:52—53)。

重新查询 专卷研经 以西结书系列
错误回报,请联系comm[@]fhl.net