以西结书 16章44节 到 16章58节   背景资料  上一笔  下一笔
Chit段经文用姊妹来形容北国以色列kah南国犹大,ná亲像双生á一般,两pêng犯罪ê情形lóng雷同,意指北国以色列犯罪致使灭亡,南国犹大并无tùi兄弟之邦ê北国灭亡学tio̍h悔改ê功课,却是有样学样,因为án-ne,面临ê结果就是灭亡。

第44节,「有其母一定有其女」,chit句话kah台湾民间俗语所讲ê「有其父一定有其子」是仝款ê意思。意思是子女ê行为是先tùi父母学来ê。Chia ê「老母」,就是第3节所提起ê「老母是赫人」,意思是teh指迦南人。

第45节,chit节讲耶路撒冷人民kah in ê「老母」之行为「仝款」,意思是teh指kah赫人仝款,lóng是属tī迦南人hit种淫乱家族ê传统。

「憎恨家己ê丈夫kah kiáⁿ」,正常ê妇女会喜爱家己ê丈夫kah kiáⁿ,m̄-koh耶路撒冷人民淫乱ê严重性,ná亲像第32节讲过ê,无欢喜家己ê丈夫反tńg喜爱kah别人私通。

「你mā像你姊妹」,这是teh指南国犹大ná亲像已经被亚述帝国消灭ê北国以色列仝款,lóng是堕落、腐败ê。

第46到47节,「你ê阿姊是撒马利亚」,这真清楚指北国以色列,撒马利亚是伊ê首都。Chia所讲ê「阿姊」,意思是大国。

「你ê小妹是所多玛」,chia用所多玛,表示he是个充满淫乱ê城市。Á chit-ê城市却是设tī犹大ê首都耶路撒冷「南边」。所谓「小妹」,意思是小国。Chia用「所多玛」,重点并无单是在tī所多玛城有淫乱ê行为,koh khah是指hit-ê城物质生活富裕了后,所带来ê傲慢,甚至对贫困者无怜悯之心,只知影贪婪,m̄知ài tī富有ê时chūn,疼惜贫困ê人(参考第49节),反却是欺负in,这是上帝siōng讨厌ê行为。Chia指犹大ê人民比起北国以色列人民kah所多玛人并无有jōa好,颠倒ê,是「koh khah邪恶」。

第48到50节,chit节tio̍h对照第47节来看;tī第47节提起讲犹大比所多玛kah撒马利亚ê恶行koh khah严重,而tī chit第48节koh khah清楚讲「所多玛kah伊周围ê村镇」并无像犹大犯hit种重ê罪恶。

Chia所谓「不照顾hiah-ê困苦sàn-chhiah ê人」,chit句话mā表示社会会失去公义ê准则,会去欺负贫困ê人(参考阿摩司书二:6),chit种恶质行为上帝绝对bē原谅。Á「骄傲」,chit-ê词所代表ê意义是:心中无上帝,á是根本无kā上帝khǹg tī眼内。Á上帝所「憎恨」ê事,就是去拜偶像。

值得注意ê,是第48到50节chit段经文lóng是以所多玛城为例,说明犹大比所多玛城弃sak上帝ê道koh khah远,这是非常严重ê一件事。因为所多玛城án-ne败坏,结果上帝kā伊毁灭à。现在犹大比所多玛koh khah恶质,ná结果án怎,用脚头u想mā知。

第51到52节,前一段(第48到50节)是提起所多玛城hō͘上帝摧毁ê事,而chit段第51到52节则提起撒马利亚城被毁灭ê事。

撒马利亚城是北国以色列ê首都,tī主前721年被亚述帝国所灭,以色列人民受掠,并贩卖到各地去做奴隶。如果撒马利亚「所犯ê罪恶iáu不及」犹大「所犯ê一半」,这表示犹大ê罪恶koh khah重大,mā teh表示:将来hō͘上帝惩罚ê严重性,必定会超过北国以色列人民所承受ê。

第53节,chit节经文真重要,表面上看起来kah-ná是上帝应允所多玛kah撒马利亚这两座遇tio̍h摧毁ê城市,有一工会恢复昔日光彩。M̄-koh事实并m̄是án-ne,chit节经文应该是一句讽刺ê话语,意思是:当上帝beh会恢复已经被毁灭ê所多玛kah撒马利亚这两座城ê时,就会恢复南国犹大ê耶路撒冷城。换句话讲,耶路撒冷城beh koh再恢复,mā tio̍h等待所多玛kah撒马利亚这两城恢复了后,á是到时chiah同齐恢复。这已经是kā耶路撒冷贬低到比所多玛kah撒马利亚iáu不如了,对过去自誉为上帝ê kiáⁿ ê以色列人民来讲,其实是充满讽刺、侮辱到极点ê话语。

Koh讲,所多玛城已经成做废墟,完全hō͘上帝所摧毁。若是beh等所多玛城tī恢复昔日光彩ê时,he就是teh kā南国犹大ê以色列人民讲,m̄-thang koh再期待了仝款,根本是完全无指望ê意思。

第54节,「你tio̍h知见笑」,chit句话mā是警语,kā犹大人民讲一定tio̍h注意,灾难ê日子真紧to̍h会来临。当in tú-tio̍h比北国以色列koh khah惨重ê灾难ê时,in chiah会发现过去in嘲(sau)笑北国以色列,in ê遭遇会比家己现在所tú-tio̍h ê灾难会加「真chē」。

第55节,chit节kah第53节是仝款ê意思,其实就是teh警告南国犹大人民,in想beh恢复、复兴起来ê机率非常渺茫。

第56到58节,chia指出犹大人民ê种种恶质行为iáu未被「揭露」出来chìn前,in m̄-nā骄傲,而且iáu嘲(sau)笑所多玛人,其实in比所多玛人iáu koh khah pháiⁿ。Taⁿ上帝严厉惩罚ê结果,是换来仇敌「以东人」、「非利士人」,以及周围「恨」犹大人民ê一kóa附近小部落、族群等,lóng会嘲(sau)笑in遭遇chit种惨状,而这是过去从来m̄-bat发生ê事,理由只有一点:in弃sak上帝,去拜偶像神明,认chiah-ê神明为in ê神,会拯救in,m̄-koh结果却是因为án-ne而「受尽折磨」,因为虚假ê神并无会救in。

重新查询 专卷研经 以西结书系列
错误回报,请联系comm[@]fhl.net