以西结书 11章14节 到 11章25节   背景资料  上一笔  下一笔
Chit段经文大大无仝tī前段经文;Tī chit段经文中,对象是hiah-ê被掠到巴比伦去做奴隶ê犹大人民。而且chit段经文带hō͘ chiah-ê受掠ê犹大人民来讲,是极大ê安慰kah鼓励,因为上帝m̄-nā为in留落来了劫后余生ê子民,而且iáu beh kā in被敌人侵占ê土地归还kā in赐福。

第14到15节,提起耶路撒冷城内ê犹大人民,in teh谈论有关hiah-ê被掠到巴比伦去做奴隶ê同胞。

「离开上主ê圣所siuⁿ远了」,意思是teh指会失去上帝ê照顾,á是讲离开上帝去拜别ê神明ê意思(参考撒母耳记上廿六:19)。Á讲chit种话ê人,mā tú好显示家己对上帝ê认bat错误。因为上帝并m̄是khiā起tī人所建造ê建筑物内面,因为án-ne,远离耶路撒冷圣殿,并无表示一定弃sak上帝。Á是讲上帝会因为人远离圣殿这建筑物,就讲上帝离开in,这是错误ê观念。其实讲出chit种话ê人,tú好讲出了in心内ê意念kah不良ê动机,in认为hiah-ê被掠到巴比伦去ê同胞,就是hō͘上帝所惩罚ê,因为án-ne,in留落来ê土地、财产,就是上帝beh「赐hō͘」in chiah-ê无受掠ê人应得ê产业,这明显是一种贪婪ê念头。

第16节,「我iáu是beh kah in同齐tī流亡ê所在,当做in暂时ê圣所」,chit句话tú好回应了第15节所提起ê。上帝iáu是beh kah hiah-ê受掠ê犹大人民同在。即使in生活tī奴隶ê痛苦生活中,上帝mā tòe in同齐受苦。

「暂时ê圣所」,chit句话真可能就是成做后来形成「会堂」ê主要催化剂。有上帝ê话语,就有上帝同在。因为上帝就是用他ê话创造宇宙万物(参考约翰福音一:1—4)。人ê心中若有上帝ê话,就会遵守上帝ê教示,上帝必定会看顾chit种子民。

第17节,「领in离开我分散in去ê各国,kā in集合起来」,chit句话tú好说明上帝beh重新做以色列民族ê上帝,上帝放ta̍k in,mā tio̍h koh一pái带领in。Chit种信息一再出现tī先知ê文献中(参考以赛亚书四十三:5,耶利米书廿三:3、廿九:14、三十一:8、三十二:37)。

第18节,真重要,说明上帝对犹大人民唯一ê要求,就是犹大人民一定tio̍h对上帝忠实,就是kā所有其它偶像神明除掉,bē koh再重犯过去弃sak上帝ê愚戆行为,却是会专心一意ê敬拜上帝。

第19节,讲上帝beh重新改造他ê子民,hō͘ in有颗「新ê灵、新ê心」,chit种新ê灵kah心,是会服从上帝ê心。这mā是一种期待,希望犹大人民会真正悔改(参考十四:6、十八:30、三十六:25—27)。

第20节,「in beh做我ê子民,我beh做in ê上帝」,chit句是非常典型ê立约句型(参考出埃及记六:7,耶利米书廿四:7、三十一:33、三十二:38)。
第21节,讲出上帝会赦免、拯救ê对象,就是忠实tī他ê子民。若是执迷不悟ê子民,上帝iáu-koh bē改变他惩罚ê计画。

第22节,teh说明ki-lō͘-pek决定怎样行,in脚下ê轮á就跟tòe in转向、行动(参考十:15—17)。上帝就是坐tī这ki-lō͘-pek宝座ê顶面。

第23节,thang续接第十章19节,讲上帝ê荣耀离开圣殿ê东门后,就是「离开城,停tī城东边ê hit座山顶」,chit座山就是橄榄山(参考撒迦利亚十四:4)。

第24到25节,讲上帝ê「灵」kā先知以西结提起来,带伊tńg来到原来ê所在—迦巴鲁河边ê营区。先知以西结非常清楚,伊ê工作kah使命就是beh kā上帝指示伊ê「一切lóng kā流亡ê同胞讲à」,这是非常重要ê一件事,mā是先知是m̄是尽责ê重要分界线。忠实上帝ê先知,一定会kā所看见ê景象、听见ê信息lóng传达hō͘上帝指示ê对象。

重新查询 专卷研经 以西结书系列
错误回报,请联系comm[@]fhl.net