以西结书 1章15节 到 1章28节   背景资料  上一笔  下一笔
Chit段经文是用「轮á」来延续叙述四活物ê景象。

第15节,「活物ê边上lóng有一个轮á」,而chiah-ê「轮á」是「触地」ê状态。对照第十章9节来看,tī chit ki-lō͘-pek ê身边lóng有一个轮á。头前讲四活物lóng有笔直ê腿,有脚蹄(参考第7节),m̄-koh现在是讲chiah-ê活物各有「轮á」thang代替笔直ê腿来行动,mā就是讲in无需要使用腿。

第16到17节,讲tio̍h轮á是「彼此直角相切」,chit句话已经说明chit四个活物beh行动,并无需要转向,随时随地lóng thang照需要,向某一个方向向前行。

第18节,chia讲「轮kho͘-á上有真chē chē目睭」,chit句话mā说明chiah-ê轮á ē-tàng详细看清楚周边所有ê一切景象,无任何事物ē-tàng隐藏这四活物ê目睭。

第19到21节,chit节讲出chit四个活物kah in ê轮á是连结成一体ê,koh khah重要ê,轮á lóng是顺服四活物ê指令,因为四活物控制tio̍h轮á。

第22节,「圆顶」,chit-ê词原本是teh指「空气」ê意思,mā ē-tàng指「太空」(参考诗篇一五○:1)。作者讲「ná亲像用显(hiáⁿ)目ê水晶做ê圆顶」,意思是teh指一个坚实ê硬体,造型为弧形ê台子样式,chit-ê ná亲像有弧形ê台子是khǹg tī「四个活物头壳顶」,看起来ná亲像水晶一般非常「显(hiáⁿ)目」。

第23节,tī chit四活物ê头壳顶是「圆顶」,然后四个活物用in身上ê「一对翼股,kah附近ê翼股连接」,这mā是第9节已经讲过ê。然后用「另外一对翼股遮盖家己ê身躯」,án-ne,就ē-tàng清楚看出一幅清楚ê图案:四个活物头壳顶顶tio̍h一个带有弧形ê台子,然后四个活物各自kā身上ê一对翼股伸出来彼此相扣tio̍h。Á坐tī这圆顶上ê,就是上帝。他会下令hō͘这四活物移动ê方向,á是teh指示beh去ê所在。

第24节,「翼股所发出ê声音」,这说明活物身上ê翼股,并m̄是静态ê,却是一直teh飞舞phah动。Chia用三种无仝ê响声来描述chiah-ê翼股phah动ê声音:

一是「kah-ná大海tī澎湃」。

二是「像大军tī喊hoah」。

三是「像全能上帝ê声音」。

第25节,chit节并无说明当活物ê翼股停止拍phah后,继续tùi「圆顶传来」ê声音,到底是甚么内容。有可能是上帝选召先知以西结ê声音,m̄-koh mā可能是上帝准备进行审判ê声音。

第26节,tī chia chiah讲出圆顶上有一个「宝座」,这宝座是用「蓝宝石造ê」。Chia用「圆顶顶面」,意指天顶。圣经作者若提起天顶ê「宝座」ê时,指ê就是上帝ê位置,而chit种「宝座」并m̄是任何一个君王ê座位ē-tàng比并。

「顶面坐teh ê kah-ná是人」,先知以西结非常小心地使用「kah-ná」chit-ê词,chit-ê词mā teh表示伊并m̄是正面看见上帝,却是tī一种雾雾无清ê状态下,因为án-ne chiah会用「kah-ná是人」chit种句话来表达照创世记第一章26节ê记载,讲上帝是用他ê「形像」来造人,chit种「形像」并m̄是用人ê词汇ē-tàng表达出来。

第27节,先知以西结kā亲目所见ê描述出来,为tio̍h是beh说明伊m̄是陷入幻想,却是真正看见上帝kah-ná是人ê样式。Chia讲出顶下两段落,身躯ê「腰部」为顶下两段落,伊讲tùi「腰部以上kah-ná是擦亮了ê铜」。「腰部以下像火」,表达ê意思是tī上帝ê四周全部lóng光辉灿烂。

第28节,chit节就真清楚指出,chiah-ê亮光lóng teh表明上帝ê「临在」、显现。而且chia强调chiah-ê光kah「虹」ê光仝款灿烂,hō͘先知以西结看见这「景象就坦覆 (thán-phak)tī土脚」,因为伊知影chit时就是上帝显现ê时刻,mā就tī chit时chūn,伊「听见」了上帝传hō͘伊ê声音。

重新查询 专卷研经 以西结书系列
错误回报,请联系comm[@]fhl.net