出埃及记 8章1节 到 8章15节   背景资料  上一笔  下一笔
Chit章是由「耶和华文献」ê资料(第1到4节、第8到15节、第20到32节等等),kah「祭司文献」(第5到7节、第16到19节等等)合编而成。Tī chit章中,主要提起十大灾难中ê第二到第四个灾难,包括了水鸡灾(第1到 15节)、虱母灾(第16到19节)、苍蝇灾(第20到32节)。

这是第二个灾难,其严重性thang tùi第3到4节看出来。诗篇第七十八篇45节、第一○五篇30节等等lóng有记载chit-ê灾难。

第1到2节,koh一pái强调上帝ài摩西带领以色列人民离开埃及ê主要原因,就是beh以色列人民敬拜他。这是属tī宗教改革ê运动,是为tio̍h beh以色列人民遵行in祖先kah上帝所立ê永远之约。若埃及国王继续反对,上帝会用水鸡塞满kui个国家当做惩罚。

第3到4节,描述水鸡之灾, 水鸡kā塞满kui个埃及河川渠道,连卧室、灶脚、身上lóng有,这是无法度想像ê景况。说明只要上帝伸手惩罚lóng真严重。

第5到7节,就án-ne惩罚开始,上帝ài亚伦kā手里ê拐指向所有河川、渠道、湖泊等,结果就亲像上帝所讲ê hit种。M̄-koh第7节ná亲像第七章11节仝款,埃及国王认为chit种tùi上帝来ê惩罚,只不过ná亲像teh进行一场「法术」beh表现能力而已。所以,伊mā tio̍h埃及ê「巫师采行法术」,m̄-nā无减低á是除灭灾难,却是hō͘水鸡ê灾难koh khah严重。这说明一件重要认bat:人想beh抵抗上帝ê作为,结果m̄-nā无用,反tńg为家己带来koh khah大ê灾难。

诗篇ê作者bat án-ne描述:「他 hō͘ 胡蝇 kui 阵到 in 中间来沾 in,koh hō͘ 田蛤 á 来 kā in 损害。(全民版)」(诗篇七十八:45)

第8到9节,这是埃及国王第一pái请求摩西kah亚伦,向上帝祈求,kā灾难消除。伊答应hō͘摩西带领以色列人民「去向上主献祭」。摩西就接受。第9节讲时间随在埃及国王家己决定。其实,时间m̄是操纵tī埃及国王手中,却是tī上帝手中。Thang由埃及国王家己选择时间,原因是伊ê巫师行法术mā需要看ê时辰,若无,就无成效。M̄-koh全能ê创造主,时间、土地lóng是他ê手创造ê。

第10到13节,埃及国王讲出「明á载」了后,摩西马上答应,并且tī隔工就向上帝祈求。伊mā提醒埃及国王「天下无亲像上主—咱ê上帝仝款ê神」,chit句话已经teh kā埃及国王讲,伊m̄是神,只有以色列人民ê上帝chiah是。Chit对埃及王来讲是真大ê冲击。

「只有尼罗河中iáu有」,表示bē kā水鸡全部灭绝,iáu保存尼罗河下游ê沼泽地带,ná原本就是水鸡ê歇ê所在。

第13到14节讲上帝听摩西ê祈祷,kā堆积如山ê水鸡清除掉。Beh tī短短一工时间内kā所有水鸡杀尽,只有全能ê上帝chiah有办法。M̄-koh却因为堆积起来ê水鸡尸体清运不完,á发出恶臭。表示chiah-ê水鸡灾难m̄是想像ê,却是真实ê。

第15节,埃及国王看见水鸡ê灾难消除后,伊随时改变心意,mā毁了伊对摩西所讲ê应允,「心koh刚硬起来,不听摩西kah亚伦」,m̄ hō͘以色列人民离开埃及去敬拜上帝。
重新查询 专卷研经 出埃及记系列
错误回报,请联系comm[@]fhl.net