出埃及记 4章1节 到 4章17节   背景资料  上一笔  下一笔
Chit章是由「耶和华文献」(第1到16节、第19到26节、第29到31节),kah「以罗伊」ê资料编辑做伙。主要是teh描述上帝怎样hō͘摩西顺服他ê呼召,去埃及带领以色列人民出来。

Chit段经文继续描述摩西想出所有ê办法beh推辞hō͘ 上帝拣选,m̄-koh当上帝决定了后,ná亲像约拿 hit种跳进海里,上帝mā是一定ài伊去完成「奴仆」的使命。

第1到5节,摩西用「以色列人m̄信我、不听我」来推辞。Tī第三章11节记载摩西bat回答上帝讲:「我是啥人ē-tàng去见法老,chhōa 以色列人出埃及?(全民版)」伊ê回答其实有理由,原因是伊乃是埃及朝廷ê要犯(参考二:15—16)。chit-má伊用以色列人民bē相信伊来推托,这mā是事实,因为当年伊就bat被in质疑过,hō͘伊心内感觉担忧、不安(参考二:14)。

上帝用摩西顾羊群ê必备工作「手杖」做教材,赐hō͘伊有行神迹奇事ê气力,á第一件神迹就是hō͘伊手中ê杖变成一条「蛇」。这「杖」mā teh代表权柄、能力。Á「蛇」,是当时埃及民间普遍供奉ê神只之一,ná亲像国王会用饭匙chhèng当做头饰,表示真有权威kah能力,是埃及人敬畏ê神灵。M̄-koh却是摩西手中thang控制、掌握ê器皿。上帝用chit种方式hō͘摩西被以色列人民信任,并知影摩西真有能力。

第6到8节,上帝继续行第二个神迹,beh hō͘摩西知影伊ê双手充满tio̍h上帝所赐ê能力。Chit件神迹就是hō͘摩西ê双手变成癞ko,chit种病tī当时认为是天谴病,是绝症。M̄-koh摩西却有能力thang hō͘癞ko病来去自如,后来伊ê阿姊美莉安长大癞ko,mā是摩西祈祷了后á得医(参考民数记十二:13—15)。上帝用chit-ê神迹mā是teh kā摩西讲,以色列人民会相信伊,而且知影伊身上有极大ê能力thang医病。因为若连癞ko病lóng ē-tàng医,其它ê病koh khah m̄是问题。

第9节,这是第三件神迹,摩西ē-tàng hō͘埃及人敬奉ê尼罗河变色,无法度lim。因为摩西ē-tàng hō͘埃及全国人民所敬奉ê尼罗河神lóng为tio̍h án-ne变色,表示摩西是绝对thang信赖ê领导者。

第10到12节,摩西koh一pái推托,chit-pái伊用「无口才」来拒绝。伊甚至表示,就算上帝kah伊讲chiah-ni̍h chē,用án-ne奇妙ê神迹奇事之能力赏赐hō͘伊,伊犹原坚定地拒绝。

M̄-koh上帝iáu是坚持beh拣选摩西。上帝hō͘摩西知影,他m̄是beh拣选会讲话ê人,却是拣选忠实ê奴仆。忠实ê奴仆只要照上帝ê指示讲话就对了(参考列王记上廿二:14)。

第13到17节,摩西iáu是拒绝上帝ê呼召,伊ài上帝差遣别人去。Chit-pái上帝「动怒」à。为tio̍h beh塞tiâu摩西讲无「口才」ê藉口,上帝决定拣选摩西ê兄哥亚伦,伊是一个真有口才ê人,thang帮助摩西。

第16节是非常重要ê一节,讲摩西teh代表上帝,所传达ê信息lóng是上帝启示伊讲ê, ē-tàng tùi摩西身上kah信息,知影上帝ê旨意。Á伊手上ê杖,就是一个记号。

重新查询 专卷研经 出埃及记系列
错误回报,请联系comm[@]fhl.net