Chit章主要teh说明制造祭司ê服装，并且为kui个圣幕ê完成做一个总结。

Tī chit章中，一再出现ê一句话：「这是照上主吩咐摩西做ê。」（三十九：1、5、7、21、26、29、31、32、42、43）作者用chit句话表示以色列人民确实是遵照上帝ê「约」teh做tāi-chì，这mā是遵守kah上帝之间「约」ê一种表达方式。Mā thang án-ne讲，kui本出埃及记就是用「一切lóng是照上主吩咐摩西做」chit句作结束。Mā是chit句话，表明人只要照上帝做，就ē-tàng hō͘ khiā起ê土地永远无受外力入侵，国家bē败亡，人民bē hông掠去做奴隶。

Chit段经文是讲tio̍h有关祭司所穿ê服装怎样缝制。仝款ê资料mā记载tī第廿八章1到14节。

第1节，chit节讲众祭司穿「华贵圣服」，意思是teh指制造ê过程相当精细，而且质料贵重。

第2到5节，chia称祭司ê衫裤为「以弗得」，手工ê精细，tùi染织ê色彩，特别是紫色染料来源，一定tio̍h tùi深海中捞贝螺吐出ê汁得tio̍h，就thang知影祭司穿tī身上ê「以弗得」，所象徵出来ê意义，已经m̄是一套尊贵ê衫裤而已，却是teh代表kah上帝之间有特别关系，chit种关系是引领全体以色列人民面对上帝ê记号。

第6到7节，chit节讲有两块红玛瑙嵌tī大祭司穿ê衫裤顶面，红玛瑙顶面「刻上以色列十二支族ê名」，表示chit位大祭司是带领全部以色列人民进入圣幕敬拜上帝ê意思。因为án-ne，大祭司进入圣幕敬拜上帝，m̄是代表个人，却是teh代表全体以色列hiah-ê人。

Chit段经文连续讲了三pái「这一切是照上主吩咐摩西做ê」，表示这是一件非常神圣ê规律，一点mā马虎bē-tàng。因为这kah敬拜上帝有密切关系。