出埃及记 39章32节 到 39章43节   背景资料  上一笔  下一笔
Chit段经文mā kah第三十五章10到19节ê记载仝款,只是第三十五章是记载准备ài动工建造圣幕kah chiah-ê物件,chia则讲全部lóng建造好à。

第32节,「上主圣幕ê一切工程lóng完成à。」表示kui个圣幕ê工程,包括祭司ê衫裤等lóng全部完成,然后用chit句话:「上主吩咐摩西ê,以色列人民一一做。」为kui个圣幕建造ê工作划下一个美满ê句点。Teh代表以色列人民确实是遵照上帝ê旨意做tāi-chì,是确确实实照上帝ê奴仆摩西ê指示做tāi-chì。Chit句话mā是kui本创世记ê主题中心:一切lóng遵照上帝ê话。创世记ê开始就是tùi chia开始,上帝讲beh有甚么,就出现甚么,一切ê开始,lóng是用上帝为准。Chit点mā是「祭司文献」ê精神。

第33到41节,描述圣幕内面一切该有ê物件,包括祭司tī圣所供职ê时所穿ê华贵圣服等,全部lóng顺利完成à。

第42节,chit节koh一pái强调所有ê chiah-ê工作,lóng是照上帝吩咐摩西ài以色列人民做ê去做。这是敬拜上帝ê事,一定tio̍h án-ne顶真地一五一十遵照上帝做chiah thang。M̄是照人ê想法,是依上帝ê命令做tāi-chì。

第43节,chit节ē-sái讲是kui个建造圣幕ê工程之总结,然后摩西teh代表以色列人民kā圣幕奉献hō͘上帝,这就是「摩西就祝福in」chit句话ê意思。是表明伊祈求上帝赐福hō͘以色列人民tī chit件建造圣幕ê事工上,lóng遵照上帝ê旨意去做,祈求上帝赐福in所做ê工,bē致使落空。

综观第廿五到三十章ê第一组建造圣幕ê工程,kah第三十五到三十九章ê第二组建造圣幕工程,无论是第一组á是第二组建造之工程,lóng有三点共同ê所在:

一是强调所有建造圣幕ê路用品,lóng是来自全体以色列人民「甘心乐意」之奉献,chiah会出现所奉献ê,lóng超过圣幕所需要ê量。

二是所有参与建造圣幕工程ê人员,lóng是以色列人民中siōng杰出、siōng优秀ê工匠,表明kā siōng好ê奉献出来hō͘上帝用。Á这mā包括后来ê祭司lóng是tùi利未家族中精选siōng优秀ê人担任(参考利未记廿一:16—23)。

三是建造圣幕ê工程,tùi siōng细微ê到siōng大ê,全部lóng是照上帝吩咐摩西去做,mā teh表明以色列人民对上帝绝对忠实ê信仰告白,用建造圣幕来表明:in lóng会遵守上帝(约)去行。

重新查询 专卷研经 出埃及记系列
错误回报,请联系comm[@]fhl.net