Chit段经文是为建造圣幕ê工程作一份财务报告，包括有物件数量，kah人力资源。M̄-koh并无说明共计jōa-chē人参与建造圣幕ê工作。

第21节，chia提起亚伦ê kiáⁿ「以伊玛」，伊是亚伦ê第四个kiáⁿ（参考廿八：1）。Mā tùi chit节thang看tio̍h圣幕ê维护工作是由利未人担当。以伊玛负责指挥利未人管理圣幕ê财物（参考民数记四：22—28）。

第22到23节，chit两节讲tio̍h工程进行是由比撒列总指挥，协助ê是亚何利亚伯，伊真gâu雕刻kah设计。

第24到31节，chit段经文详细列出建造圣幕所使用ê物件总数，同时记落来一笔人口调查结果。

第24节，chia讲奉献出来ê黄金共计有一千公斤。

Tī第25节、第27到28节，lóng有记载银á总数是三千四百三十公斤，chiah-ê银á全部lóng用tī圣幕里ê骨架顶（参考廿六：15—25）。

第29节讲奉献出来ê铜，共计有二千四百二十五公斤。

第26节，chit节提起人口普查后登记ê人数，年龄tī「二十岁以上ê」，共有603,550名。以色列人算人口ê时chūn，lóng是用「二十岁以上男丁」为准则，而且ē-tàng作战ê chiah算（民数记一：3、20），chit-ê数目并无包括利未族在内（参考民数记一：47）。若是kā所有大细、男女老幼，加上利未族人，出埃及ê人数保守估计有kā近二百万人。