Chit章主要是「耶和华文献」ê资料（第1节、第3到4节、第12到23节），á「以罗伊文献」ê资料是第6到11节，「祭司文献」ê资料只有第2节。编辑者则加上第5 节。

Chit章thang看tio̍h慈悲ê上帝虽然tī极大忿怒中降落瘟疫惩罚以色列人，m̄-koh他iáu是坚守kah以色列人ê祖先所立之约。Chit章mā讲上帝无koh亲自带领以色列人前进迦南，却是差派天使带领in，chit种叙述句tú好说明tùi拜金牛偶像神明ê事件了后，上帝kah以色列人之间有「距离」。

Chit段经文是续接第三十二章34节后面，上帝讲beh派天使kah以色列人同行，他无koh亲自带领，chit件事hō͘以色列人感觉相当「悲伤」。Tùi chit段经文mā thang反省一个重要信仰主题：犯罪累累ê子民，怎样ē-tàng期待上帝同在、带领？

第1到2节，chit节iáu-koh继续提起上帝kah以色列人ê祖先ê约定，beh带领in进入应允「亚伯拉罕、以撒、雅各，kah in后代」到上帝赏赐ê土地去khiā起。Tī chia并且koh一pái提起hit所在是当地原住民khiā起ê土地，chiah-ê原住民lóng是当时迦南地ê族群，包括有迦南人、亚摩利人、赫人、比利洗人、希未人，kah耶布斯人等，这六族一再被提起。

第3节，是真重要ê一节，mā ē-sái讲是上帝对以色列民族siōng大ê惩罚，虽然他应允一块非常肥而且流奶kah蜜之地hō͘ in，m̄-koh上帝却无kah in同往，这表示上帝iáu-koh履行他ê约，m̄-koh无上帝同在，就算土地koh再美mā是枉然。因为chiah-ni̍h súi ê土地，真紧to̍h会hō͘外族入侵á丧失所有。这mā是基督教信仰siōng重要ê认bat：无上帝，就会失去所有ê一切。有上帝同在，欠缺ê一切lóng会得tio̍h补足。有上帝，chiah会有一切。

Koh讲，当初上帝ài摩西带领以色列人建造圣所，而且制造约柜放入去他kah以色列人所立之约，表示上帝kah in同在。taⁿ上帝讲boài kah in做伙，án-ne，圣所ê建造等于无用，mā无意义。

第三，chia讲上帝m̄ kah以色列人民同行，原因是in「顽劣」，上帝可能会koh再因忿怒á惩罚in致使koh khah chē人死亡。因为án-ne，m̄ kah in同往，这mā是一种「恩典」，m̄-koh另外一个面向，却是惩罚。

第4到6节，以色列人chit-má已经清楚了，若无上帝，in就算拥有ná肥koh流奶kah蜜之地，mā是无用。因为án-ne，in lóng感觉相当ê「悲伤」，决定「无koh配戴装饰品」，á上帝mā决定tī in无koh配戴任何装饰品后，beh koh再查看in是m̄是真正忏悔，á是只是表面上ê忏悔而已。就án-ne，以色列人决定取落来身上所有配戴ê装饰品，表示悲伤、哀恸ê谦卑样式。