Chit章除了第1到3节是属tī「祭司文献」ê资料以外，其它ê lóng是「以罗伊文献」ê作品。

Tùi第廿一章2节起到廿三章19节止，lóng是tī十诫ê基础上，讲tio̍h有关人kah人之间生活ê关系。清楚说明信仰上帝，一定tio̍h用实际生活ê行为表明出来。换句话讲，疼上帝，并m̄是用嘴讲ê，mā m̄是用想ê，却是一定tio̍h tī生活上，以实际行动表现出来。Hō͘人kah人之间有一个生活准则，为tio̍h是beh回应上帝，知影上帝是位非常重视纪律ê神。

Ná亲像我tī头前讲过ê，十诫ê基础是tī第一诫，其余九诫lóng是tùi忠实tī上帝á延伸出来ê诫命。仝款ê，十诫是一切律法、规章之母，tùi án-ne延伸出真chē细节ê规定。以现代ê语言来讲，十诫就kah-ná是宪法，然后tùi宪法延伸出真chē律法、规章，为tio̍h是beh执行宪法ê精神。

Chit段经文lóng是讲tio̍h有关以色列人民kah奴隶之间应该tio̍h注意kah应有ê关系。Mā thang参考耶利米书第三十四章8到22节，讲tio̍h以色列人民过去bat tī埃及当过奴隶，因为án-ne，in koh khah应该知影怎样好款待奴隶。Bē-tàng欺压奴隶。

第1到6节，这部分thang参考申命记第十五章12到18节，其中siōng大ê差别是tī申命记第十五章ê 15节kah 18节，这是出埃及记所无ê。是teh指男性奴隶讲ê。Chia提起「第七年」，就是tùi第七日安息日延伸来ê安息年。一定tio̍h tháu放奴隶tńg去，而且bē-tàng the̍h任何赎金。Chia强调当时奴隶怎样来，就怎样tńg去。若是有奴隶无想beh tńg去，就一定tio̍h带伊去「敬拜ê场所」，意思是teh指以上帝ê名chiù-chōa，永远属tī主人，然后用穿耳洞做记号。

第7到11节，chit段经文是讲tio̍h女性奴隶kah男性奴隶siōng大ê差别，是女性一旦被卖为奴，就是终生为奴。原因是女性为奴可能会为主人生gín-á，老母有照顾gín-á ê责任。M̄-koh，女婢ê亲人thang用钱赎tńg来，除非已经被主人纳做妻妾。伊无亲像男性奴隶只要等到第七年就thang自由离开。而且规定bē-tàng kā女婢随意转卖，特别是bē-tàng转卖hō͘外族人，这lóng是teh保护女婢thang有被赎tńg来ê机会。若是买cha-bó͘-gín-á做bó͘，就一定tio̍h kui世人照顾伊，bē-tàng有遗弃ê行为。