出埃及记 15章1节 到 15章12节   背景资料  上一笔  下一笔
Chit章是用「耶和华文献」ê资料为主轴(包括有第1到18、27节),「以罗伊文献」(第20到21节、25节b句),kah「祭司文献」(第22到25节a句、26节)三种资料,加上编辑者附上ê第19节混合编辑而成。

Chit章主要是记载以色列人民teh歌颂上帝伟大ê拯救,hō͘ in脱离埃及人ê手。In用诗歌讲述上帝用大能ê手带领in出埃及,koh tī极危险ê时chūn,koh用奇妙ê神迹击退埃及ê追兵。

Tī chit首歌颂ê诗歌中,咱看tio̍h一个非常重要ê信息:上帝就tī以色列人民中间,kah in同行。这mā是基督教信仰siōng重要ê信息之一:上帝就tī咱生活中间,每一工kah咱同在,kah咱行过每段ê时刻、每一个路程。

一般来讲lóng确认chit段诗歌是摩西所写ê。Á第13到18节真可能是后代加笔。因为tī第13节ê「引chhōa in到你ê圣地」,以及第18节ê「做王」无亲像是伊ê经历,前者,in chiah tú出埃及,后者提起ê以色列人民之君王观念,tī旷野ê时iáu未成熟,是进入迦南地安居一段真长时间了后,tī先知撒母耳时代chiah发展出来(参考撒母耳记上第八章)。Chit段诗歌主要是teh歌颂上帝用他大能ê手带领以色列人出埃及,并且平安地行过红海,koh hō͘埃及ê追兵lóng淹灭tī大海中。

第1到3节,开始就讲这是一首相刣胜利ê诗歌。「战马kah骑兵」,这lóng是teh形容埃及精锐部队。第2节tùi「我ê上帝」到「阮老父ê上帝」,这表明上帝就是kah以色列人民之间有永远之约ê上帝。以色列人民mā ài用「战士」来形容上帝是会为in相刣ê神(参考申命记一:30—31,撒母耳记落来五:23—24,历代志下二十:17)。Tī以色列人民ê观念中,只要上帝kah in出兵,一定phah赢。因为án-ne,每pái出兵相刣,一定tio̍h先询问上帝ê旨意(参考列王记上廿二:5)。

第4到5节,chit两节thang参考第十四章6节、第8节、第27到28节。Chia ê第4节讲「Kā siōng杰出ê军官淹死tī红海」,chit句话回应了第十四章7节,埃及派出精锐战车部队,m̄-koh结果lóng像第5节所讲ê ná亲像「石头沉入海底」。

第6到10节,chit段经文描述上帝ê大能,m̄是人ê能力所ē-tàng抵挡。Mā说明上帝创造之物,lóng会听从上帝ê命令kah指挥。海洋ê水,经由上帝ê受气一吹,就会亲像墙壁仝款竖立起来,海底mā因为án-ne变做干地。当上帝koh一pái pûn气,海水照常听从上帝ê命令,重新复合起来,就án-ne淹灭了埃及所有ê追兵,hō͘ in「像铅沉无tī深水中」,表示永远葬身海底,á是讲因为对敌上帝á被落到深渊ê所在。

第11到12节,chit两节mā反应出埃及王kā家己当做神明hō͘人民崇拜,m̄-koh tī chia真清楚指出,伊m̄是真正神,伊只是人而已,若无伊带来tui-jiok以色列人民ê精锐部队就bē葬身海底。

重新查询 专卷研经 出埃及记系列
错误回报,请联系comm[@]fhl.net