前一首hông称做是摩西ê诗歌。Chia忽然记载出现摩西有一位阿姊美莉安，伊带领以色列人民跳舞唱歌颂赞上帝。

第19节，chit节ē-sái讲是讲头前诗歌ê浓缩，mā是美莉安tī第21节带领以色列妇女唱歌颂赞上帝之诗歌ê序言。

第20节，chia讲美莉安是亚伦ê阿姊，伊同时mā是一位「先知」。民数记第十二章2节记载上帝mā对美莉安讲话，传达上帝ê信息hō͘人民。因为án-ne，伊tī以色列人民中间ê地位是lóng受尊崇。

Chit节mā讲美莉安带领以色列妇女「the̍h-tio̍h铃鼓」，然后带领跟tòe伊ê妇女「一面phah鼓，一面跳舞」。这mā是一种表示极大喜乐kah性命得tio̍h重生ê雀跃方式。

第21节，诗歌讲上帝「得tio̍h光荣ê胜利」，chit句话说明上帝亲手kah埃及精锐部队相刣，kā埃及军队ê「战马kah骑兵lóng投进海里」，意思是phah垮了埃及追兵。