出埃及记 1章1节 到 1章7节   背景资料  下一笔
Ná亲像创世记仝款,出埃及记mā是由几种无仝ê传统资料混合编辑而成ê。包括siōng古老,出现tī主前950年代左右ê「耶和华文献」;tī主前750年左右出现ê「以罗伊文献」;主前550年代ê「祭司文献」。

Tī第一章mā是用chit三种文献混合编辑。第1到5节、第7节、第13到14节等等,lóng是属tī「祭司文献」。第6节、第8到12节等等,lóng是属tī「耶和华文献」ê资料。Á第15到22节则「以罗伊文献」ê资料。

Chit段经文thang看tio̍h「祭司文献」ê特色,就是族谱ê记载相当详细。除约瑟外,作者kā雅各kah伊十一个「直系」gín-á ê名lóng写出来。总数是「七十人」。Chia所讲ê「七十人」是包括约瑟家ê口数在内(参考创世记四十六:27)。M̄-koh,tī使徒行传ê资料却讲有「七十五人」(参考使徒行传七:14)。

第5节,chia特别指出雅各带入埃及ê人口,因为约瑟是早就受卖到埃及,而且因为约瑟当上了埃及宰相,chiah hō͘雅各有机会带tio̍h家族进入寄居。

第6节真清楚讲「约瑟死去,伊ê众兄弟kah in ê同辈mā lóng死去」,这是teh指第2到4节所提起ê hit一代ê人。其实chit节mā为出埃及记以后ê故事留一个伏笔,因为约瑟kah伊同辈ê人lóng死去,mā是teh表示埃及人已经渐渐bē记得in过去tī埃及所做一切ê事。

第7节,chit节是kui个出埃及故事ê背景siōng重要ê经文。因为chit节mā teh说明后来以色列人民tī埃及受tio̍h苦难ê主要原因,是危kah埃及社会ê稳定。Tùi雅各chhōa「七十人」进入埃及到chit-má,已经是「koh chē koh强盛,遍及埃及全境」。这说明雅各ê kiáⁿ孙tī埃及发展了相当快速,已经m̄是用一个家族chit种观念thang形容,á是beh用大族,而且有发展出大国ê趋势。因为án-ne,无koh用「雅各」ê名称,á改用「以色列人」,表明ê是十二支派ê总和。



重新查询 专卷研经 出埃及记系列
错误回报,请联系comm[@]fhl.net