Tùi第五章21节到第六章9节，chit段经文是讲tio̍h三个主题，包括：第五章21到33节有关夫妻间ê问题；第六章1到4节父母kah子女；第六章5到9节，有关主人kah奴仆（á是奴隶）之间ê关系。这三项lóng是属tī家庭生活范围ê部分。Teh谈论chit三个问题ê时，lóng有一个特点，就是tùi「bó͘」、「kiáⁿ」、「奴仆」开始讲，mā就是先tùi「弱者」开始讲起，chiah讲「丈夫」、「父母」、「主人」等强者。

第21节，chit节是chit段经文ê序言，mā是chit段论述ê基础，就是tī「敬畏基督」chit-ê基础上。

第22到24节，使徒保罗tī chia用「彼此顺服」当做讨论夫妻关系ê基础，是kah头前第18节ê「tio̍h被圣神充满」chit句话有关系。因为所讲ê「顺服」是teh指tī圣神引chhōa ê基础上，却m̄是因为人ê关系，chit-ê认bat是非常重要ê。因为只有tī圣神引chhōa之下，chiah ē-tàng结出美好ê果子。M̄是人ē-tàng做甚么，却是圣神作工，hō͘人重新tńg来到上帝ê救恩里。因为án-ne，伊teh谈夫妻关系ê时，开始就以「敬畏基督」做基础，当做夫妻彼此顺服ê记号，因为án-ne chiah ē-tàng见证夫妻之间有圣神ê充满。Á「顺服」有几个基本ê态度：1.是甘愿放弃一切。2.宁可成做奴仆ê卑微样式。3.即使是献上性命mā心甘情愿（参考腓立比书二：6—8）。用chit种态度看夫妻关系中ê「顺服」ê时，就真清楚à。因为这kā咱讲「顺服」ê一个siōng基本ê要件就是「甘愿」。无「甘愿」ê心境，是无算是顺服ê。Koh讲，使徒保罗kā夫妻ê关系用「教会」做譬喻。伊清楚讲tio̍h：耶稣就是教会ê元首，而教会就是基督耶稣ê身躯（参考以弗所书一：22—23）。Bó͘对待丈夫ê态度应该是kā丈夫看做是家庭ê「头」。M̄-koh，tio̍h注意，使徒保罗并m̄是讲丈夫是家庭ê「救主」。

第25到28节，使徒保罗tī chia所用ê「爱」字，是希腊文动词「Agapao」，chit-ê字ê名词是「Agape」，意思是teh指无条件、不需任何代价ê「爱」。Chit种「爱」，tī圣经中就是teh指上帝对人类ê「爱」，mā是teh指耶稣tī十字架上ê「爱」。使徒保罗kā chit-ê「Agape」ê「爱」用tī丈夫ê责任上，就是丈夫对bó͘ ê「爱」，就beh亲像上帝对人类ê疼仝款，又ài像耶稣献身tī十字架上ê疼仝款，是lóng无条件、无法度取代、甘愿牺牲ê疼。Chit种ê疼mā是无法度用任何条件取代ê。Mā就是讲，即使bó͘有任何问题，丈夫iáu一定tio̍h「爱」伊爱到底，直到bó͘往生为止。注意第26节使徒保罗tī chia提起「藉tio̍h伊（基督耶稣）ê话、用水来洁净教会」，真真明显是kā丈夫对bó͘ ê疼提升到非常高ê境界，超越肉体上ê需要，á是tī其他外在ê需求，却是性命ê终极目标，chit-ê认bat非常重要。仝款ê，如果当丈夫ê，无chit种心境去疼家己ê bó͘，婚姻ê关系就会真容易陷入危机中。因为夫妻是性命ê结合体，无chit种认bat，婚姻性命真紧会结束。

第29到33节，tī chit段经文中，使徒保罗用身躯来表明夫妻ê关系，这是取材tī创世记第二章21节到25节所记载：上帝是用人身上ê一条胸坎á骨来造另外一个人。这充分说明一点：cha-bó͘人kah cha-po͘人ê关系是一体ê，无法度分开。因为in彼此ê关系是「骨中骨」、「肉中肉」。第31节是引用创世记第二章24节，夫妻原本就是「一体」，chit种一体m̄是数学ê数字问题，却是性命ê连结。第32节thang讲使徒保罗谈chit段夫妻关系ê结语，mā是siōng重要ê一句话，伊讲夫妻ê关系，有ná基督kah教会ê关系一般，无法度分开。