Chit章是teh讨论一个人若有基督耶稣tī伊ê性命里，伊应该活出怎样ê性命。使徒保罗特别强调上帝透过耶稣向所有ê人，无论犹太人á是外邦人，lóng teh显示他奇妙ê疼。只要是罪人，lóng需要上帝ê救恩，无任何人例外。

Kā chit段经文kah第一章13节对照来看，就会比较清楚了；tī第一章13节提起信耶稣ê人，是属tī上帝作印记ê对象，上帝作印记ê主要目的，就是hō͘ chit-ê人ê性命tùi死里kah耶稣同koh活。Mā就是tī chit章开始所讲ê「以前」是死ê，chit-má因为信耶稣成做koh活ê人。使徒保罗讲享受chit种恩典ê人，并m̄是因为家己有甚么能力chiah得tio̍h ê，是凭tio̍h信心得tio̍h ê。信心，是对耶稣绝对ê仰赖，因耶稣改造咱。

第1到3节，tī chit段经文中，使徒保罗真清楚讲出犹太人kah外邦人仝款，lóng是生活tī罪恶ê中间。伊ê chit种讲法对犹太人听来是真oh接受ê。因为tī犹太人ê认知中，外邦人才是生活tī罪恶中，而in是kah上帝有割礼chit种「性命ê约」，已经有得救恩典ê人。M̄-koh，使徒保罗则m̄是持chit种看法，伊认为只要是人，lóng是活tī罪恶中。

Tī chit段经文中，咱事(tāi)先看tio̍h ê字眼是「以前」，表示是tī信靠耶稣chìn前。使徒保罗以耶稣做一个分界来诠释人性命ê无仝情况是，tī耶稣chìn前kah了后，有极大ê性命内涵ê差别。Koh讲，tī chit段经文中看tio̍h另外一个字眼，就是「阮」kah「Lín」；如果是用「阮」，所表示ê是teh指犹太人。如果是用「Lín」，对象就是外邦人，á是teh指以弗所教会ê外邦人信徒。

第4到7节，使徒保罗tī chia提起上帝有丰富怜悯ê疼，hō͘所有信耶稣ê人，虽然lóng tī罪恶中死去，却ē-tàng因为án-ne kah耶稣同koh活，这是上帝赏赐ê特别恩典，是tī耶稣内面显示出来ê疼。

第8到10节，如果行为ē-tàng hō͘人得救，án-ne就无算是所讲ê「恩典」。使徒保罗讲tio̍h「恩典」ê时，指ê是：本来m̄是人应该得tio̍h ê，chit-má却因为耶稣ê缘故，上帝lóng无代价ê就赏赐hō͘人，án-ne chiah是真正恩典ê意思。基督教ê信仰是讲因为上帝ê慈爱缘故，tī耶稣内面，上帝愿意lóng无条件地赐爱hō͘人类。Án-ne，人是tùi耶稣ê身上白白得tio̍h到这特别ê恩典，因为án-ne，人无法度用之来夸口，只有ē-tàng分享而已。