以弗所书 1章15节 到 1章23节   背景资料  上一笔  下一笔
Ná亲像头前提起过ê,此书信siōng中心ê思想是tī第22到23 节讲ê,基督就是教会ê元首,教会是耶稣基督ê身躯。换句话讲,所有信耶稣ê人,lóng是结连tī耶稣ê身上,因为án-ne之故,tī基督ê名而形成ê信仰团契,彼此之间是无贵重á是卑贱ê分别,á是大kah小ê区别。因为人人lóng是属tī基督耶稣救赎ê对象,lóng是属tī一个共同信仰团契一份子。

第15到17节,使徒保罗听tio̍h以弗所教会信徒有真好ê信心,表现tī彼此之间ê相疼,这是伊siōng感觉欣慰ê事,为tio̍h án-ne,伊对上帝献上感谢。注意第17节chia所讲「圣神会hō͘ lín智慧」,chia「智慧」一词,是teh指「认bat上帝」ê意思,是明白有关上帝ê事。一个人ē-tàng明白上帝ê事,m̄是靠tio̍h人家己ê努力á是能力,mā m̄是因为人ê学识背景,却是tùi上帝来ê启示(请参考哥林多前书一:21—25)。

第18到20节,使徒保罗为所有阅读此书信ê人代祷,恳求天父赏赐hō͘阅读ê人有智慧,明白上帝ê旨意,特别是明白上帝行了大能奇事,并hō͘耶稣tùi死里koh活,hō͘ koh活ê耶稣基督tńg来到天顶。

第21到23节,koh活ê基督,就是一切ê主宰,统治tio̍h一切万有,特别是教会ê头。所有属tī基督名号ê教会,就是基督ê身躯。这说明两项基本认bat:甚么人分裂了基督ê教会,等于teh分裂基督身躯仝款。Tī基督ê教会内,无任何人ē-tàng自视比别人koh khah贵重。因为真正信仰中心,m̄是teh指某一个人,却是tī koh活ê基督。

重新查询 专卷研经 以弗所书系列
错误回报,请联系comm[@]fhl.net