传道书 2章1节 到 2章26节   背景资料  上一笔  下一笔
Chit章作者感觉一切lóng是空虚ê时,想beh有所改变ê方式是选择「享乐」来突破性命ê局限,而伊所讲ê享乐是teh指感官上ê享受。

第1到3节,传道者ê心内已经决定beh án-ne做,就是亲身去体会tio̍h底「享乐」、「享福」对性命ê意义是甚么,结果家己ná亲像小丑仝款,hō͘人看起来就想beh发笑。表示会失去分辨能力,「享乐lóng无益处」,无得tio̍h想beh得tio̍h ê。就án-ne想beh「藉酒自娱,走chhōe快乐」,因为「酒」thang hō͘人目nih-á bē记得苦恼,可能hō͘人感觉兴奋,á是hō͘身躯减轻痛苦感觉舒畅。M̄-koh ná亲像俗语所讲ê「借酒浇愁,愁koh khah愁」。

第4到8节,作者想用建造花园ê方式,改变生活环境,希望用chit种方式来hō͘家己快乐。伊建造富丽堂皇ê建筑物,ná亲像皇宫一般。而且iáu栽种葡萄树,而且「修造庭院果园,种植各种果子树」,并「挖掘水池,灌溉树木」,这lóng teh表示chit-ê人若m̄是一个大财主,就是一个君王。有chiah-ni̍h堂皇ê大厝kah广大ê庭园,就需要有人来帮忙整理。因为án-ne,chit-ê人就去买来真chē「男女婢隶」来协助整理看管。Tùi第8节ê描述来看,chit位大财主真亲像所罗门王,因为伊有一千个嫔妃(参考列王记上十一:3)。M̄-koh却因为有chiah-ni̍h chē ê财富kah嫔妃,hō͘伊弃sak了上帝,án-ne并无值得。因为离开上帝,人就会「随心所欲」到最后会丧失一切。

第9到11节,chit位君王á是大财主,确实是真富有,伊ê富有「强大,赢过任何在耶路撒冷tòa过ê人」,并且自认「头尾有智慧」。Chit-ê自认真有智慧ê君王á是财主,kā身上ê财富用来「尽情享受,无受拘束」,伊认为chiah-ê钱lóng是家己辛劳得tio̍h ê,应该hō͘家己好好á享受,这是一种对家己辛劳得来ê「报酬」,ná亲像第4到8节所描述ê一切,án-ne看起来,全部所做所为lóng是理所当然。M̄-koh当伊「回顾」观察ê时,便发见「家己ê成就,思想所付出ê辛劳」lóng白费,因为伊「领悟到一切lóng是虚空,lóng是捕风」。就án-ne伊讲「日头下脚ê一切lóng无益处」,chit句话koh一pái tńg来到了第一章3节所提起ê。因为所有ê物件lóng会变化、摧毁、消失。

第12节,「一个君王所ē-tàng做ê,lóng是用往ê君王所做过ê」,chit句话回应第一章9到10节。意思是无甚么是新ê,lóng是旧ê。Chia thang看tio̍h一个自认真有智慧ê君王,所ē-tàng做ê事mā m̄是甚么新事,án-ne,伊ê智慧koh算是甚么?kah狂妄、愚昧koh差jōa-chē?其实是仝款ê。

第13到14节,chit两节用智慧kah愚笨作比较khah。真正「智慧」是会「赢过愚昧」,至少智慧者会知影人ê性命有限,需要上帝ê扶持,比起「愚笨ê人却tī黑暗中摸索」,是beh好过千倍。圣经作者ài用「光明」kah「乌暗」来说明性命ê两种结果,就是生kah死。Tī chia作者讲聪明人kah愚笨ê人,结果lóng仝款。原因就是人lóng会死,无任何人ē-tàng用家己ê方法hō͘ 性命延长、bē死(参考路加福音十二:25)。其实两个之间ê差别是:

聪明人因为看见可能会面临死亡而操心,会想出所有ê办法beh脱离;而愚昧人却是因为无敏感度,á是根本就是无知。M̄-koh两个ê结局果lóng仝款面对死亡。

第15节,「愚昧人ê遭遇mā是我ê遭遇」,因为作者自认真有智慧(参考第9节),m̄-koh tī chia却真清楚指出,任何人lóng一定tio̍h面对死亡ê来临,这tú好是传道书ê中心题旨:死亡,是上帝赏赐hō͘人类siōng公平ê礼物。作者tī-chia koh加上一句,尽管是聪明,只要想tio̍h死亡,就bē感觉聪明对性命有甚么特别「益处」à。因为án-ne,伊讲「一切lóng是空虚」,表示人对死亡根本就无法度掌握,mā无法度制止,只有ē-tàng眼睁睁地看tio̍h它ê来临。

第16节,chit节回应了第一章11节。Chit节讲出第14到16节所提起ê,只要是死亡,大家lóng仝款ê,无任何人例外。这真清楚讲tio̍h「无论是智是愚,lóng tio̍h死去」,无任何人ē-tàng因为聪明有例外。

第17节,chit节回应了第3节所提起ê,作者teh追求智慧ê驱使心之下,开始走chhōe性命ê意义,m̄-koh结果却发见死亡罩tiâu tī每一个人ê性命,hō͘人消耗真chē时间teh思考án怎避免死亡,事实却是人永远脱离死亡ê威胁。

第18到19节,chit两节是作者对性命ê省思。人一生「辛劳」lóng是会累积「财富」(m̄-nā是thang数ê金钱,mā包括才能、知识、性命经历等无形ê财富),因为「无法度m̄ kā一切留hō͘后人」,chiah-ê累积ê财富会由甚么人继承?koh khah重要ê,继承ê是「智」者,á是「愚」笨ê人?这只有上帝知影。因为人看起来聪明ê,往往是上帝眼中ê愚昧者。

第20到21节,chit两节thang参考路加福音第十二章16到20节。Chia提起「智慧、知识、技能」等三样,总括代表ê意义就是智慧。经文中提起m̄-koh虽然拥有chiah-ê,m̄-koh,kah得tio̍h遗产ê人互相比较,心内iáu是真m̄甘愿,因为得tio̍h遗产ê人是不劳而获。

第22到23节,「操心、辛苦、劳碌」等用词lóng指仝款ê意思。因为劳碌ê结果仝款是「痛苦愁烦」,结果致使「夜夜bē-tàng安宁」,表示身心lóng受tio̍h痛苦。

第24到25节,作者tī chit三节讲出性命siōng基础ê要件就是:性命需要有上帝ê参与,只有án-ne,chiah是得tio̍h幸福ê泉源。作者强调只有tī「上帝ê旨意」之下,人「ē-tàng lim食,享受伊辛劳ê成果」,án-ne chiah算是siōng大ê「幸福」。第25节ê「若m̄是出tī上帝」,chit句话mā ē-sái讲是kui本传道书ê中心思想,讲出一切lóng是出tī上帝ê赏赐,若无,人即使劳碌一生累积真chē财富,性命mā无法度满足。Ē-tàng享受食ê、lim ê,其实lóng是tùi上帝来赏赐ê结果。因为án-ne,tio̍h用感恩ê心来回应,而且会知影珍惜,因为这一切lóng是上帝赏赐,这mā是为甚么祖先lóng会警告kiáⁿ孙bē-tàng暴殄天物ê原因。

第26节,chit节是相对句。「智慧、知识,kah喜乐」chiah-ê lóng是上帝赏赐ê恩典。Chit种恩典是赏赐hō͘ hiah-ê属tī上帝「欢喜ê人」。相对ê,上帝所无欢喜ê人,就是「罪人」,mā就是只知影想tio̍h家己享受,却bē记得上帝恩典ê人。Chit种人,无论累积jōa-chē,最后lóng会亲像捕风仝款,一无所有。

重新查询 专卷研经 传道书系列
错误回报,请联系comm[@]fhl.net