传道书 11章1节 到 11章10节   背景资料  上一笔  下一笔
Chit章mā是由真chē谚语所组成,是kah生活有密切关系,m̄-koh主题mā不外乎是论到人对性命ê认知有限,因为án-ne,做kóa预防是有帮助ê。

第1节,「Kā你ê钱投资teh对外贸易上」,原本希伯来文是teh指「粮食掖tī水面」,tī《中文和合本》、天主教《思高版本》、《吕振中教授版本》,以及《台语汉字本》lóng是采用chit种译文。Thang án-ne理解:古早时,粮食就是资产,农村社会甚至会用粮包(chhek-á-pau)当标会ê筹码。若án-ne,则《现代中文译本》翻译做「钱」并m̄是错误。若是「粮食」,thang譬喻做「钱」、「资产」,则「对外贸易」,就是teh指做买卖seng-lí。

第2节,「ài tī有khah好无仝ê所在投资」,ná亲像第1节所提起ê,若是kā粮食、财产分配到需要ê所在去,ná亲像chia所讲ê「khǹg tī有khah好无仝ê所在」。「因为你m̄知tī chit世间会遇tio̍h甚么恶运」,表示人对性命ê掌控能力非常薄弱。Mā thang讲人对未来ê事所知有限,tio̍h适度分散风险,ná亲像俗语所讲ê「m̄-thang kā鸡卵khǹg tī仝一个篮á里」。

第3节,chit节意思是teh指该会怎样,就会怎样,m̄是用人ê能力ē-tàng阻挡,因为每件事ê背后,lóng会隐藏tio̍h上帝奇妙ê旨意。

第4节,「等待风调雨顺」,若是作穑人种田有chit种心态,伊就「永远掖不了种」,án-ne就「永远无法度收割」。这说明若是beh等到外在一切条件lóng好势chiah ài做,án-ne就永远做不了事。

第5节,性命是一种奥秘,是上帝奇妙ê创造,即使今á日医学科技thang藉tio̍h仪器观察胎儿tùi受孕到成熟出世ê成长过程,却iáu无法度理解性命ê奥秘,koh怎样ē-tàng知影上帝创造宇宙万物ê奥秘?

第6节,「早起暗时lóng tio̍h掖种」,意思是teh指m̄-thang等待风kah日丽ê时chūn chiah掖种,因为m̄知hit种ê日子甚么时chūn会来到。「m̄知早起掖ê是m̄是比暗时掖ê好」,chit句话真清楚说明世界á是生活ê环境怎样变化,无人ē-tàng知影,只有勤奋工作chiah是正确ê性命态度。

第7节,chit节表示人活teh ê时chūn,ē-tàng「享受」性命ê时刻,就是幸福ê事。

第8节,「beh为每一年ê寿命感恩」,是teh指无论活jōa久,lóng是上帝赏赐ê恩典。因为除了上帝以外,无人ē-tàng预知未来会发生ê事。性命ê时间非常有限、thang数,m̄-koh死亡却是永远。

第9节,「少年」kah「青春」lóng是teh指性命中siōng具活力ê阶段。「随心所欲做你欢喜做ê事pah!」,这表示少年人真有理想、异象,而且有冲劲、活力。因为án-ne,thang放心尽管去做家己欢喜ê事。

「m̄-koh,tio̍h会记得,上帝beh按照你ê行为审判你。」这是一句真严肃ê警语。所谓「随心所欲却无超过矩」,就是chit-ê意思。因为上帝是审判者,他是性命ê主宰。希伯来书第四章13节讲,每件事lóng无法度隐瞒,而且每一个人lóng ài面对上帝ê审判。

第10节,「烦恼」,mā thang做「悲愤」、「恼怒」、「忿怒」等解释。传道者讲年青ê岁月中,若是有chit种心境缠身,就会hō͘人感觉性命真「痛苦」,这等于是tī浪费性命仝款,结果就是「空虚」,甚么mā无得tio̍h。

重新查询 专卷研经 传道书系列
错误回报,请联系comm[@]fhl.net