阿摩司书 8章1节 到 8章14节   背景资料  上一笔  下一笔
Chit章除了提起另外一个新ê异象外,koh khah重要ê是谈起上帝对北国以色列ài beh进行ê审判。Tī chit段审判中,先知阿摩司提起北国以色列真正ê问题,并m̄是因为经济发生困难,á是受tio̍h外敌入侵,因为tī耶罗波安二世执政时代,北国以色列ē-sái讲是siōng强猛ê时代,ná亲像列王记作者所讲ê,tī伊治理之下ê北国以色列「收复了所有属tī以色列ê领土,tùi北方ê哈马隘口直到南方ê死海」(参考列王记下十四:25)。M̄-koh án-ne强有力ê军事kah经济力量,却因为对上帝ê话毫无在意,结果弃sak了上帝,然后tùi国王到人民犯奸作科ê处处可见,tùi án-ne引起上帝极大ê愤怒,hō͘亚述帝国来惩罚in。

第1到3节,这是上帝hō͘先知阿摩司看见一个异象。这异象是hō͘伊看见「一篓熟了ê果子」,这tī中文《和合本》译文用「热天ê果子」,chit-ê字tī希伯来文ê发音类似,mā是双关语,mā thang讲是teh指「结局」。果子若是熟了,摘就会lak落来。因为án-ne,chia上帝就kā先知阿摩司讲北国以色列ê「结局已经来到à」。

注意第3节ê「hit一工」,这是先知阿摩司siōng特别ê信息,因为伊改变了本来以色列人民所传承ê观念,认为「hit一工」就是「耶和华日子」来临ê时,是一个大喜ê日子,m̄-koh现tī先知阿摩司传讲出来ê「hit日」kā是一个不堪入目的惨状,「宫廷ê唱歌会变做悲伤ê哀歌」,因为「四界lóng是尸体,一片死寂」,指敌人入侵造成ê惨状。

第4到7节,chit段经文koh一pái指控以色列人民ê罪状,除了是有权势者对贫困者欺压ê罪状,koh khah严重ê是in对上帝ê藐视,m̄-nā不在乎「神圣ê节期」,甚至是用轻视ê态度teh看待安息日。

Chia所谓「神圣ê节日」,是teh指「月朔」,是teh指每月ê第一工。照民数记ê规定,「每月ê初一tio̍h献烧化祭hō͘上主」,献祭ê内容有清楚ê规定,而且是「一年中月月án-ne」(参考民数记廿八:11—14)。Á安息日ê规定则koh khah清楚了,he是神圣ê日子,无法度工作,遵守安息日是表明in kah上帝之间有「约」。M̄-koh taⁿ in是希望chiah-ê宗教节期赶快过去,为tio̍h beh无闲做seng-lí thàn钱,而且是用欺骗手段,做法有「假法码kah小升斗欺骗顾客」,以高价出售「劣等ê麦á」,并且kā hiah-ê无法度「iáu债ê sàn-chhiah人用一双凉鞋ê价钱kā伊买落来做奴隶」,chìn前先知阿摩司就bat指责in做过chit款tāi-chì,用一双连鞋ê价钱卖sàn-chhiah人去做奴隶,不怜悯sàn-chhiah人却是the̍h钱去买酒lim、嫖妓(参考阿摩司书二:6—8)。这是上帝siōng无法度容忍ê行为。

第8到9节,chit两节真清楚讲tio̍h上帝ê惩罚时刻来到,天地lóng会变色,chit时,人无论过去tùi欺骗thàn取jōa-chē财富lóng teh-beh失去。因为天地若变色,连人ê性命mā无法度保存落来。Án-ne,即使thàn得了全世界mā是枉然。

第10节,chit节讲出了北国以色列ê哀歌。「佳节变做葬礼,欢乐变做悲伤ê哀号」,chia所讲ê「佳节」是teh指丰收节期,原本是teh庆祝欢乐,现在却beh变成悲痛ê葬礼;「欢乐」,原来是teh指青年男女彼此传达爱情ê时唱出ê情歌,现在,chiah-ê情歌kā变成哀歌。痛苦哀号ê声音,就ná亲像厝里有独生kiáⁿ往生一般ê艰苦心。

第11到12节,chit两节是阿摩司书ê中心信息。Chia讲人会干渴,并m̄是无食物、水,却是因为听bē-tio̍h、mā chhōe bē-tio̍h上帝ê话。申命记ê作者以色列人民出埃及进入旷野漂流ê四十年经验,tī hit四十年间,欠缺水、食物,却因为上帝ê话帮助in度过hit段艰辛ê旅途(参考申命记八:3)。这真清楚teh说明若是无上帝,人即使有得食、lim、穿,性命mā bē感觉饱足,只有tńg来到上帝内面,人chiah会感觉性命丰富有chhun。

第13到14节,灾难接踵而来,即使是少年力壮ê少年人mā无法度佳哉免得,因为灾难实在是太严重à。注意第13节koh提起「tī hit一工」,这属tī上帝审判ê日子。Hit日子来临ê时,只要是向偶像神明祭拜过、许过愿ê人,lóng会受到严厉ê审判。

重新查询 专卷研经 阿摩司书系列
错误回报,请联系comm[@]fhl.net