阿摩司书 7章1节 到 7章17节   背景资料  上一笔  下一笔
Tùi第七章到九章,除了第七章10到17节有关祭司亚玛谢ê事件外,其余lóng是记载先知阿摩司所看tio̍h ê三个异象。第1到3节是看tio̍h一阵草蜢;第4到6节是看tio̍h火,第7到9节是看tio̍h主khiā tī一道tú砌好ê墙边,手中the̍h铅垂线。

    第1到2节,一提起「草蜢」ê灾难,这真紧to̍h hō͘咱想起出埃及故事中,上帝bat使用草蜢ê灾难惩罚埃及帝国。Chia讲正当「王家土地第一期ê农作物已经收割,第二期ê幼苗tú开始puh芽」,chit时上帝差遣草蜢来袭,kā所有tú收成起来kah tú发芽出来ê农作物「全部食光」,这真清楚表示饥荒随时来到。先知阿摩司随时向上帝祈求,恳求上帝「饶恕」以色列人民,伊讲以色列人民是「koh渺小koh脆弱,怎样受得了」chiah-ni̍h大ê灾难。

    第3节,「上主ê心软化了」,表示上帝垂听先知阿摩司ê代祷。先知阿摩司讲出一个siōng重要,mā是圣经作者siōng常提起ê一件事:ē-tàng改变上帝发出受气唯一ê方法,就是悔改,走chhōe上帝ê饶恕。只有án-ne,chiah ē-tàng hō͘上帝「心软化」落来,而免除一切原本beh降落ê灾难。

    第4到5节,这是上帝hō͘先知阿摩司看见ê第二个异象,就是上帝beh用「火」来「惩罚」以色列人民。Chit种惩罚就是连「地下ê水源lóng烧干了,koh开始火烧地面上ê一切」,这真清楚就是上帝beh用火烧尽in所有ê一切,这会hō͘北国以色列人民过去眼中认为siōng安全、贵重ê荣华、财富、军事、政治kah经济能力等,上帝lóng teh-beh kā所有ê chiah-ê lóng烧光。

    Kah第一个异象共同ê所在,就是先知阿摩司koh一pái向上帝恳求「停止」chiah-ni̍h严重ê惩罚,因为以色列人民kā无法度承受得à。

    第6节,kah第3节所记载ê仝款,上帝ê心koh因为先知阿摩司ê恳切地祈求而「软化了」,就决定chit件计画tio̍h用火烧毁一切ê惩罚「免了」。

    第7到9节,这是第三个异象。Chia第7节chiah讲「一道tú砌好ê墙」,续落来就是第8节就出现「一道倾斜ê墙」。「铅垂线」,这是久长以来建造房屋者所用来做衡量ê工具。特别tio̍h注意ê,是chit pái上帝讲这tńg来「绝对bē饶恕in了」。因为in是一而再、再而三犯罪,m̄听劝勉。第9节chia用「以撒」来代表以色列,这mā是圣经中唯一ê一pái。Koh讲,tī chiah-ê异象中,先知阿摩司无koh替以色列人民代求à。真可能是因为上帝the̍h铅垂线量hō͘伊看见,发现以色列ná亲像一道已经teh要倒落来ê围墙,已经无法度挽回à。

    第10到11节,第10到17节chit段经文是提起有关伯特利大祭司亚玛谢beh阻止先知阿摩司传达上帝ê信息。

    「伯特利」城ê意思是:上帝ê厝。后来伯特利就成做以色列人民ê宗教圣地。Tī南北分裂ê时chūn,北国ê开国国王耶罗波安一世,为tio̍h beh hō͘北国以色列人民无koh怀念设tī南国ê耶路撒冷圣城,就kā设tī北国ê伯特利建造成政治、宗教中心,因为án-ne,chiah会被先知亚玛谢kā它称做「宫廷圣殿,是国家礼拜中心」。Á「伯特利ê祭司」,这意思是teh指大祭司,mā等于是北国以色列位阶非常高ê官员,伊派人去kā国王讲先知阿摩司「煽动人民」,ài人民「背叛国王」。Chit种罪名,是足以kā先知阿摩司判处死刑。因为伊讲阿摩司ài人民「背叛」国王耶罗波安二世,这等于是teh进行叛乱ê行动。甚至iáu诅咒耶罗波安二世「会tī战场上阵亡」,而「以色列人一定会tùi本土流亡到国外」,这清楚表示以色列会灭亡。

    第12到13节,另外一方面祭司亚玛谢koh指责先知阿摩司,ài伊tńg来到家己ê故乡南国「犹大去讲教」。亚玛谢甚至用讥笑ê口吻讲先知阿摩司mā thang tńg来到南国犹大谋得一官半职,成做御用ê宗教师,hō͘犹大人民「供养」伊。亚玛谢特别强调伯特利是「宫廷圣殿,是国家礼拜中心」,不允准先知阿摩司随便讲话。。

    第14到15节,先知阿摩司听了后,真紧to̍h回应祭司亚玛谢讲,伊m̄是自愿当先知,mā m̄是为tio̍h「金钱」chiah出来「讲道」,伊原本是一个「看管桑树ê作穑人」,mā是一个「顾羊人」。Chit种表白是非常重要ê,因为这至少讲出:真正先知m̄是靠学习得来ê,是tī上帝呼召下,出来传讲上帝ê信息,而伊所传讲ê话,lóng是上帝亲自传授hō͘伊ê。

    第16到17节,是先知阿摩司回应祭司亚玛谢ê结语,chit两节讲ê lóng是灾祸kā降临在祭司亚玛谢ê家庭。先知阿摩司ài祭司亚玛谢注意听上帝ê话,伊ê家庭teh beh面临严重ê灾祸—bó͘ kā变成「娼妓」,伊ê kiáⁿ「lóng tio̍h tī战场上死亡」,亚玛谢家己mā会死tī异乡。Á北国以色列会被灭亡,人民会「流亡国外」去做奴隶。

重新查询 专卷研经 阿摩司书系列
错误回报,请联系comm[@]fhl.net