使徒行传 8章5节 到 8章25节   背景资料  上一笔  下一笔
Chit段经文开始绍介早期教会推选出来七位充满圣神ê帮助者之一ê腓利(参考六:5),伊就是逃离迫害ê时,到撒马利亚去。因为有圣神充满,因为án-ne,腓利mā有行神迹ê能力。M̄-nā ē-tàng医疾病,mā有能力赶鬼。Mā因为án-ne,撒马利亚人得tio̍h腓利ê福音事工,充满了欢喜。

第9到13节,提起一位原本靠tio̍h行邪术过生活ê「西门」,真受撒马利亚人ê欢迎,而伊mā真骄傲、自满。M̄-koh后来因为腓利到chia城来传福音了后,大家开始接纳耶稣福音ê信息,连西门mā相信à。伊接受腓利ê行洗礼,看tio̍h腓利大有能力行神迹奇事,就感觉真惊奇。

第14节,福音广传ê消息传tńg来了耶路撒冷教会,大家心中ê ài用脚头u想mā知。因为án-ne,就差派彼得kah约翰到撒马利亚去访问kah鼓励信徒。这mā表示耶路撒冷教会已经成做当时所有外地福音事工ê中心,另外一方面,mā teh表示耶路撒冷拥有「权威」ê样式。

第15到17节,chit三节经文一再引起真chē议论。为甚么撒马利亚ê信徒lóng受洗了,iáu beh彼得kah约翰为in按手chiah会有圣神ê降临tī信徒身上?而这mā是后来引起chit位原本行邪恶骗钱ê西门ê觊觎ê原因。比较可能ê一种讲法是teh表示chiah-ê来自耶路撒冷ê使徒,确实是tī in身上有圣神充满。因为án-ne,只要经过in按手,领受按手ê人就会充满tio̍h圣神。
第18到19节,chit段经文讲chit位接受洗礼了ê西门,伊虽然是信耶稣了,m̄-koh,并m̄是真正明白真理,竟然想用钱向彼得kah约翰「买」圣神,thang hō͘伊也ē-tàng亲像in仝款,hōaⁿ手tī甚么人身上,甚么人就充满tio̍h圣神。Tùi伊chit种举止就thang看出,伊对信仰ê认知真有问题。英文有一个字"Simony",意思是「购买圣职」,就是tùi chit-ê典故来ê。

第20到23节,西门chit种举动随时遇tio̍h彼得kah约翰ê制止,并且严词谴责,讲伊「心术不正」,而且「当teh啃tio̍h嫉妒ê苦果,做罪ê囚徒」。
第24节,西门听了后赶紧悔改,求彼得kah约翰为伊「向主祈求」,m̄ hō͘伊被罪所捆绑。圣神是自由ê,m̄是跟tòe人ê意思而定,因为圣神是上帝ê能力,上帝照他ê旨意在做tāi-chì。M̄是人ài怎样,就怎样。

第25节,彼得kah约翰m̄-nā tī撒马利亚传福音,mā tī tńg来耶路撒冷ê途中继续见证福音ê信息。换句话讲,in并无因为有迫害出现,就噤若寒蝉。却是用koh khah坚定ê信心传福音。

重新查询 专卷研经 使徒行传系列
错误回报,请联系comm[@]fhl.net