Chit段经文是使徒行传第三pái记载有关使徒保罗tī大马士革tú-tio̍h koh活ê主耶稣之经历，mā是三pái中siōng简单ê一pái。第一pái tī第九章，第二pái tī第廿二章。

第13到14节，chia有两点真值得注意，一是发生跋倒事件ê时间是tī「透中昼」，有「比日头ê光koh khah强烈」ê光，照射到使徒保罗。二是伊听见对伊讲话ê声音，是用「希伯来话」，并且koh附加了一句希腊俗语：「牛用脚踢主人ê刺棒，反tńg伤tio̍h家己。」chit句话ê意思是家己讨皮痛。使徒保罗套用chit句话，表示家己努力用残酷ê手段迫害基督徒，最后是家己受伤害。

第15到18节，chia提起几件要紧ê事：一是koh活ê耶稣拣选使徒保罗做「奴仆」。二是伊受拣选是beh差派到犹太人kah外邦人中间去做见证。三是伊受差派主要就是宣扬上帝透过耶稣带hō͘全民ê拯救恩典。