犹太人领导当局确实是想置使徒保罗tī死地了后chiah罢休。由大祭司亚拿尼亚带头，带领几个长老kah一个名叫帖土罗ê律师前往该撒利亚去，beh向腓力斯控告使徒保罗。

第2到9节，是帖土罗律师控告ê内容，主要有几点：（1）使徒保罗是一个四界制造乱事ê人，是危险份子。（2）是拿撒勒教派ê领袖，意思是叛乱组织（á是非法组织）ê分子。（3）污辱了犹太人圣殿ê神圣。另外有一项是附带ê控告，就是经文中无出现ê第7节，《现代中文译本》圣经用附注khǹg tī边á写tio̍h：「阮原想beh按照阮ê律法审判伊，想bē到指挥官吕西亚硬加干涉，tùi阮手中kā伊抢去，并命令各原告lóng到你chia来。」换句话讲，in chiah-ê人tī耶路撒冷想beh kā使徒保罗谋杀to̍h bē-sái得，teh指挥官吕西亚解送使徒保罗来该撒利亚后，in干脆就连指挥官吕西亚mā告入去à。

Chiah-ê控告除了本来in就诬告ê第三项「污辱了犹太人圣殿ê神圣」之罪名外，前两项koh khah是子虚乌有ê事，ná亲像当年犹太人宗教领袖控告耶稣四界煽动人民mài缴税hō͘罗马皇帝仝款（参考路加福音廿三：2、5），是非常政治性ê，却是罪证非常薄弱。