使徒行传 19章11节 到 19章20节   背景资料  上一笔  下一笔
使徒保罗是一个被圣神充满ê传道者,伊m̄-nā传讲耶稣koh活ê信息有力,而且有医病、赶鬼ê能力。

第11到12节,chia讲使徒保罗身上充满tio̍h圣神ê能力,因为án-ne,有人「Kā伊用过ê手巾á是围裙the̍h去khǹg tī病人身上,ē-sái疾病消除」,也ē-tàng hō͘邪灵tùi人身上驱离出去,这ná亲像耶稣身上充满能力,只要摸tio̍h伊外袍ê一角,所有摸tio̍h ê人lóng得医仝款(参考马可福音六:56)。

第13到16节,有人看见使徒保罗有chit种奇特ê圣神同在之能力,就跟tòe学习mā想用耶稣ê名赶鬼,而做chit款tāi-chì ê竟然「是犹太祭司长士基瓦ê七个kiáⁿ」。M̄-koh并无效果,因为in ê心并m̄是真正beh信耶稣,却是想假借耶稣ê名行骗人ê事。因为án-ne,in m̄-nā赶bē出鬼,反tńg hō͘ 鬼攻击得koh khah厉害。使徒保罗并m̄是家己有甚么能力,却是因为圣神tī伊ê身上作工。换句话讲,人无法度命令圣神作甚么,却是圣神tī人ê身上作工,以见证上帝ê疼。如果人乱使用上帝ê名义,结局会hō͘上帝所审判ê。士基瓦ê七个kiáⁿ因为乱使用耶稣ê名,结果m̄-nā无赶出邪灵,反tńg被邪灵所攻击就是一个例。

第17到20节,结果士基瓦七个kiáⁿ ê事件,以弗所城ê人lóng知影,大家赶紧kā所拜ê偶像神明,kah in过去所做违反信仰ê事,lóng坦白承认,并且kā真chē行邪术ê册lóng the̍h出来烧毁,单单chiah-ê册ê价钱就高达「五万银币」,这数目若以当时一工工资是一块银币来换算,ē-sái讲是一笔庞大ê钱。

重新查询 专卷研经 使徒行传系列
错误回报,请联系comm[@]fhl.net