使徒行传 1章12节 到 1章26节   背景资料  上一笔  下一笔
Chit段经文有两个重要ê主题,其一是关系犹大ê死。其二是关系递补门徒犹大死后留落来ê缺。

犹大ê死,tī早期ê教会流传tio̍h两种讲法,一种是马太福音第廿七章3到10节记载ê,讲犹大后来吊tāu自杀à。另外一种就是作者路加所收集ê版本,犹大是坠死。虽然详细内容无仝,m̄-koh有一点是仝款ê,he就是犹大出卖耶稣并无得tio̍h伊想得tio̍h ê,无论是钱mā好,á是所讲ê有「政治企图心」mā好,换句话讲,人想beh用家己ê方式改变上帝ê计画,he是真愚戆ê想法。

另外一个主题是关系拣选另外一个人递补犹大,这kah早期教会ê发展有关。使徒团iáu是希望维持「十二」chit-ê人数,mā可能是kah犹太人ê十二支派之传统有关。彼得订出递补ê条件是:「Chit-ê人一定tio̍h是当主耶稣tī咱中间出入ê时――tùi约翰行洗礼开始到耶稣被接升天为止hit段期间――头尾kah咱做伙ê人。」

当时符合chit-ê条件ê人bē少,因为跟tòe耶稣ê人真chē,m̄-koh,耶稣只tùi chiah-ê人中间拣选出十二名做门徒。M̄-koh chiah-ê跟随者并无因为无被选上就脱队了,无,in iáu是跟tòe耶稣到耶路撒冷,而且亲目chiu金金看见伊受难、koh活。Chit种心境是真重要ê。

第23到26节,in tùi众人中间「推选两个人,就是约瑟kah马提亚」。经过祈祷了后,用「抽签」方式,「抽出马提亚来」,án-ne,koh变成「十二个使徒」à。


重新查询 专卷研经 使徒行传系列
错误回报,请联系comm[@]fhl.net