Chit章记载有关大卫王军事争战记录，并m̄是tī伊建造王宫了后chiah有ê，ná亲像第五章17到25节大卫被北部以色列支派代表膏立为王了后，非利士人就趁机会出兵攻打，想beh阻止大卫统治以色列全国，m̄-koh非利士人失败à。因为án-ne，若是kā第八章ê经文编辑tī第五章了后，读起来会koh khah通顺。

M̄-koh mā有另外一种看法，认为大卫统治以色列全国了后，真想扩张国家领土，有kóa人tòa tī kah非利士人附近ê边界，不时受tio̍h非利士人ê干涉搅扰，mā有部分边界城市iáu被非利士人侵占tio̍h，就án-ne，伊tī整顿以色列国政了后，就积极beh安定chiah-ê边界城市，因为án-ne，大卫m̄-nā是派兵出征非利士人，连来侵入骚扰ê摩押人，大卫lóng一并征讨。Á chit段有关大卫征讨附近国家、族群ê战绩，mā同时记载tī历代志上第十八章1到17节。

Chit段经文讲述了大卫王讨伐ê对象，包括有非利士人、摩押人、琐巴、叙利亚，并且得tio̍h真chē战利品。

第1节，tī大卫开始服侍扫罗王了后，直到伊统治以色列国，只要伊出兵征战，非利士人lóng会败tī伊ê手下，这mā是非利士人一直想beh chhōe机会击垮大卫威名ê原因，就tī伊被膏立为北部以色列人ê王ê时，非利士人随时就出兵，m̄-koh，无成功。chit-má是大卫主动继续进攻，主要原因是头前所提过ê beh安定边界。根据历代志上第十八章1节ê记载，此役大卫占领了「迦特城kah附近庄头」。

第2节，摩押人是罗得kah cha-bó͘-kiáⁿ乱伦所生ê kiáⁿ孙（参考创世记十九：37）。In khiā起tī死海ê东边，扫罗bat kah in交战（参考撒母耳记上十四：47）。大卫逃亡期间，mā bat请求摩押人协助庇护伊ê父母（参考撒母耳记上廿二：3—4）。Tùi路得记第四章17节ê记载，咱thang知大卫ê祖先kah摩押人有密切关系。照常理来讲，大卫kah摩押人之间应该有真好ê互动关系chiah-tio̍h，m̄-koh却m̄知何因，二者之间kah-ná有深仇大恨，chiah hō͘大卫用「量二绳长ê刣死，hō͘量一绳长ê存活」残酷作法恶待摩押人。Mā因为án-ne残酷ê手段，hō͘摩押人tī大卫时代，差不多m̄敢轻举妄动，只有ē-tàng归顺伊ê统治，并且得年年向伊进贡。

第3到4节，琐巴国是tī以色列ê北部地区ê国家。大卫趁琐巴王哈大底谢想beh夺tńg来in原本ê土地ê时phah败in，in原本tòa tī幼发拉底河地区，是中东地区siōng肥土地之一，创世记甚至kā该处描写ná亲像「伊甸园」súi（参考创世记二：14）。大卫占领chit块土地，对tī伊统治之下ê国度，一定有非常重要ê意义，因为了后以色列人民就无缺水ê顾虑。大卫下命令只有留落来可拉一百辆战车ê马匹，其余ê马匹lóng kā脚筋砍断而残废。伊会án-ne做，就以现代ê语言来讲，等于是「解除武装」仝款，为tio̍h是beh hō͘琐巴国完全无抵抗ê武力。Chit种作法kah当年约书亚攻打当时迦南地ê联军，采取ê态度是仝款ê（参考约书亚记十一：6）。

第5到8节，原本大卫并无teh想beh攻打叙利亚人，因为叙利亚来支援哈大底谢，chiah hō͘大卫一定tio̍h趁势打击。叙利亚会来支援，真可能当时幼发拉底河沿岸ê真chē族群tī政治、军事顶面ê联盟有关。Á对大卫来讲，chit场胜利，mā确实对kui个幼发拉底河地区ê其他族群产生警惕作用。特别是tī chit pái战争中，大卫ê军队刣死两万三千叙利亚军队，chit场战争胜利了后，大卫直接派军进驻这流域，hō͘「in lóng归顺大卫」，这意义非常特殊，因为chit地区差不多就是迦南地ê「粮仓」。M̄-nā án-ne，大卫mā tùi琐巴人ê城市—「比伊」、「比罗伊」这两城市得tio̍h大量ê铜，后来chiah-ê lóng成做建造圣殿siōng好ê建材。