撒母耳记下 3章31节 到 3章39节   背景资料  上一笔  下一笔
Chit段经文koh一pái强调有关约押刣死押尼珥ê事件,大卫完全是无辜ê。因为大卫若是刣死无辜ê命,就会ná亲像拿八ê bó͘亚比该当时阻止大卫杀害拿八ê时所讲ê:「Hit 当时,我ê 主m̄ 免为tio̍h 流无罪ê 人ê 血,申家己ê 冤,致使有甚么忧闷,á 是心内家己责备。(全民版)」(撒母耳记上廿五:31)身为一国之君,若是滥刣无辜,bē是一个好君王,chit-ê观念是非常重要ê信仰认知。因为án-ne,当约押杀害押尼珥了后,引起大卫极大ê愤怒,m̄-koh mā显示大卫对tī拥兵自重ê约押,已经无约束能力。因为án-ne,伊chiah会感慨ê讲「我无法度应付」chit句话。大卫用非常哀荣ê方式,办理押尼珥ê丧事,这mā说明大卫beh hō͘北方ê以色列人知影,大卫对押尼珥ê死,确实是无辜ê。

第31到32节,tùi chia thang看出大卫ê愤怒kah悲伤之深,伊直接「命令约押kah伊ê部属lóng拆裂衫裤、穿麻衣,为押尼珥哀哭」,这无疑是对约押极大ê谴责,m̄-koh大卫mā只有ē-tàng án-ne,却无法度对约押ê违抗命令hō͘ in任何制裁、惩罚。伊亲自为押尼珥举行隆重ê葬礼,有ná国葬ê隆重,而伊「亲自跟tòe tī棺木后面行」,单是án-ne就hō͘北方以色列人心服。大卫án-ne做,thang讲达tio̍h两个效果,一是对约押有震撼kah教示ê作用,二是hō͘北方以色列人感受tio̍h安慰,而认同大卫是无辜ê。

第33到34节,这是大卫为押尼珥所写ê挽歌,清楚表示押尼珥是hō͘谋害ê。Tī大卫ê心目中,押尼珥是一个有智慧、聪明人,若无,伊bē主动来kah大卫谈和解ê事,因为伊知影国家局势ê转变,而且知影怎样tī双方对敌之下,hō͘伤害降到siōng低ê程度。Mā thang讲,大卫ê诗句,已经teh说明约押chiah「像戆子」,却m̄是押尼珥。Tī chit首诗中,大卫o-ló押尼珥是一个自由人,是一个脚手都无被捆绑ê人,mā tī chit挽歌中,伊控诉约押是亲像暴徒仝款杀害押尼珥。

第35到39节,大卫用真chē方式来表明对押尼珥被杀害ê事件,伊是清白ê。并且因为án-ne得tio̍h全体以色列人民ê信赖,知影伊无参与chit件谋害ê事。大卫甚至肯定讲以色列「死去一位伟大ê 将领」,伊并无因为伊是对敌一方ê 将领,就抹灭伊生前ê功绩。至少,押尼珥带领北部以色列归顺大卫统治,减少了以色列民族彼此之间ê仇恨、互相残杀,这就是「伟大ê 将领」应该有ê态度。M̄-koh大卫mā同时感慨家己虽然是上帝选立ê王,却是「bē-tàng为力」、「无法度应付」,约押杀害押尼珥ê行踏,因为约押确实是伊手下ê大将,拥有强大ê军权。这mā说明大卫心中一直会记tiâu chit件事,等待惩罚约押ê机会来到。

重新查询 专卷研经 撒母耳记下系列
错误回报,请联系comm[@]fhl.net