撒母耳记下 24章10节 到 24章25节   背景资料  上一笔
Chit段经文讲述大卫后来发见因为chit项人口调查行动,引起上帝极大ê愤怒,致使以色列全国发生严重ê瘟疫,死亡惨重,为tio̍h án-ne,伊走chhōe上帝ê赦免怜悯,透过献平安祭kah烧化祭,chiah挽回上帝ê愤怒,m̄-koh为ê时已晚。这mā说明一个重要ê教示:若m̄是出tī上帝ê旨意,á是符合上帝ê旨意,án-ne,执意坚持行家己ê路,其结果kan-taⁿ会带来koh khah大ê灾难而已。

Chit段记事thang对照历代志上第廿一章7到30节来看,就会发见历代志作者特别强调,瘟疫ê事件,m̄-nā是大卫主谋,连伊身边ê参谋lóng连带有份,因为án-ne,「大卫kah众长老lóng穿tio̍h麻衣,面伏tī土脚叩拜」,表示in lóng一定tio̍h为tio̍h án-ne事件所带来ê瘟疫灾难负责。

第10到13节,后来灾难发生,chiah唤醒大卫知影家己坚持ê chit项人口调查政策,确实是违背上帝ê旨意,hō͘上帝无欢喜,因为án-ne决定beh惩罚以色列。伊可能是因为看见瘟疫开始出现,赶紧透过祭司献祭询问上帝ê时(参考撒母耳记下廿一:1),chiah明白过来,知影家己做件愚戆ê事。上帝差遣先知「迦得」去见大卫,传达上帝ê话hō͘大卫。伊向大卫提出上帝beh tùi三项惩罚ê方式中hō͘大卫家己选择。

第一项是「国中有三年饥荒」。

第二项是大卫tī「敌人面前逃亡三个月」,意思是phah败仗逃难。

第三项是「国中有三工ê瘟疫」。

这三项lóng有「三」ê数字,tùi「三年」到「三个月」,再到「三工」。

第14到16节,大卫表示宁可接受上帝亲自对伊惩罚。大卫深知当上帝惩罚违背他旨意ê子民ê时,痛苦ê哭号声,上帝会垂听。因为「上主有丰盛ê怜悯」,chit点是kui本圣经ê主题(参考出埃及记三十三:19、三十四:6,诗篇八十六:5、一0三:8、但以理书九:9)。因为án-ne,大卫做chit种选择后,上帝就差派天使去执行chit项惩罚,方式是用降瘟疫tī以色列人民身上,直到上帝beh天使停止为止。虽然只有短短ê三工而已,死亡人数却chē kah「七万以色列人死亡」。

问题是:为何大卫犯罪,却由人民承担罪责?án-ne是m̄是公平?这是读者欢喜问ê问题。其实,mā thang án-ne了解:当君王á是领袖做出错误 ê政策ê时,确实就是整体人民teh承担苦难。古往今来lóng是án-ne。因为chiah-ê制订政策,而且kā政策执行出来ê时,直接影响tio̍h ê就是普罗大众。因为án-ne,人民若是对tī 错误 ê政策,无勇气出来阻止、对抗,其结果是等于「参与执行、配合错误」之政策。

第17节,历代志作者tī chia提供真重要ê资料,就是大卫看见天使「手中掠tiâu剑,teh beh毁灭耶路撒冷」,就tī chit时,「大卫kah众长老lóng穿tio̍h麻衣,面伏tī土脚叩拜。」这mā表示众长老知影,大卫进行户口调查ê事所引起之「瘟疫」灾难,in mā需要负起重大责任。因为án-ne,in同时kah大卫lóng用siōng真诚忏悔ê心意,祈求上帝ê怜悯kah赦免。Tī chia,大卫对执行chit项惩罚任务ê天使讲,是伊犯错应该惩罚伊kah伊ê全家,却m̄是惩罚无辜ê人民。

第18到23节,先知迦得koh一pái传达了上帝ê信息,hō͘大卫知影愿意接受伊认罪。因为án-ne,ài大卫tī耶布斯人亚劳拿 ê phah麦场,建造一座祭坛敬拜上帝。大卫照天使ê指示去chhōe亚劳拿,希望买伊ê phah麦场建造一座祭坛,thang hō͘上帝惩罚ê瘟疫停落来。亚劳拿一听大卫án-ne讲,认为大卫是故意án-ne讲,其实,若大卫真正ài伊ê土地,伊mā无可能抗拒。因为án-ne,伊表示ē-tàng全部lóng送hō͘大卫,包括tī phah麦场顶面ê牛mā thang刣之当做牲祭献hō͘上帝,koh有phah麦板thang当之祭坛ê柴火。因为伊知影,掠准kah大卫讨论价钱,赠送有可能iáu thang保全性命安全。

第24到25节,m̄-koh大卫坚持beh「按价钱」向亚劳拿购买伊ê phah麦场。原因是伊无想beh占亚劳拿 ê sio̍k。因为若是占别人sio̍k所得tio̍h来奉献,等于是teh藐视上帝ê神圣。Koh讲,大卫已经因为「瘟疫」ê事件惹起上帝愤怒,taⁿ,若tī奉献ê事顶面无用真诚忏悔之心意来表明,恐惊chit pái ê「瘟疫」之灾真oh消除。就án-ne伊用「五十块银á」向亚劳拿买phah麦场kah献祭ê牛只。这数目kah历代志作者所提供ê「六百块金币」,相差实在siuⁿ大。有一种解释,认为大卫m̄-nā买phah麦场,连附近kui片地lóng买了落来。因为伊准备以后用该片土地做建造圣殿ê路用。就án-ne,大卫买了土地,进行一场献「烧化祭和平安祭」(参考利未记七:11—17、廿二:21—23)ê祭祀礼仪,chit种「祭」表示kah上帝之间ê关系和谐(参考出埃及记廿四:5、11)。因为上帝「垂听」了大卫为以色列全国ê祈祷,这表示以色列人民kah上帝之间koh有和好关系,所以作者用「瘟疫就tī以色列停止了」做结束。Chit-ê结尾,ná亲像第廿一章14节所讲ê:「上帝垂听in为国家ê祈祷。」

重新查询 专卷研经 撒母耳记下系列
错误回报,请联系comm[@]fhl.net