撒母耳记下 23章8节 到 23章17节   背景资料  上一笔  下一笔
Chit段经文中特别绍介大卫身边三个重要ê军事武kā,撒母耳记作者kā它称做「三巨头」。Chit段描述chit三位重要军事将领ê事迹,mā同时记载tī历代志上第十一章10到19节中。对照两处经文来看,就会发见差别非常大,m̄-nā是勇士ê名有别,就连记事ê内容mā差别真大。撒母耳记ê记事比较完整,作者详细写出「三巨头」ê名kah事迹。M̄-koh历代志作者只有写两个,第二个只写出名,无写出伊ê事迹,无标明第三个勇士ê名,m̄-koh却有第三个勇士ê事迹。真可能,历代志作者是kā第三个战役kah第二个混合编辑做伙了,mā就是kā第三个勇士沙玛ê事迹,lóng归并tī以利亚撒ê事迹中。不过,后半段记载有关大卫m̄ lim三勇士冒tio̍h性命危险去取水ê事迹,虽然文字上有kóa许差别,m̄-koh kui个过程来讲,是大同小异。

第8到12节,chit段经文记载三个勇士ê事迹。Tio̍h注意ê,是chia所提供ê名,往往m̄是代表一个单独ê个人,却是chit-ê人领导之下ê部队。因为án-ne,大卫身边应该有两种特别部队,一是编制khah小ê,另外一个是比较大ê。chit-má所提起ê三个勇士,应该是属tī比较小,类似「突击部队」ê组织型态。

第一位勇士是「伊革扪人约设・巴设」,是chit三个「巨头」ê首领,意思是先锋。Tī历代志提供ê名是「哈革摩尼宗族ê雅朔班」。伊是一个真有力量ê勇士,thang「用矛凿死八百人」。

第二个「亚合族人朵多ê kiáⁿ以利亚撒」,这kah历代志所提供ê名仝款。Chit-ê「亚合族」就是便雅悯支派ê「亚何亚」kiáⁿ孙(参考历代志上八:4)。有一pái「以色列人后退了」,tī历代志koh khah清楚写明chit句话ê意思是「以色列人逃走」,这是phah败仗ê现象。M̄-koh这支队伍并无后退,继续坚守tio̍h据点,直到phah败非利士人为止。M̄-koh in phah赢ê时,「只剥光敌人尸体上ê盔甲」,意思是以色列人民卸下非利士军人身上ê武装做战利品。

第三个是「亚基ê kiáⁿ沙玛」,ná亲像第二个仝款,当以色列战败,真chē人teh逃窜ê时chūn,沙玛一屑á 都无kiu-kiu,伊khiā tī非利士人ê面前,勇敢抵挡到最后,结果伊mā获胜à。Ná亲像作者所强调ê,若m̄是有上帝ê帮助,一定会输得真惨。M̄-koh因为有上帝ê帮助,tī siōng艰困ê战况下,以色列人iáu ē-tàng反败为胜。

Chia讲非利士人是聚集tī「扁豆田里」,这表示以色列人若输了chit pái ê战争,可能就会引发粮荒。就ná亲像今á日为tio̍h保护粮食ê稳定,一定tio̍h无顾一切奋战到底仝款。

第13到17节,这是另外一段记事,tī历代志上第十一章15到19节mā有记载。照撒母耳记ê写法,chit段mā可能是tī增加头前绍介过ê三位勇士ê事迹。对照chit两段经文ê记事来看,会发见大部分记载是仝款。

「收割ê时chūn」ê chit场战役,真可能是发生tī大卫teh逃避扫罗王追杀ê时chūn(参考撒母耳记上廿二:1—4),如果是发生teh逃避扫罗追杀ê时期,án-ne,chit时ê大卫,伊ê指挥中心,就是设立tī亚杜兰洞ê所在。M̄-koh mā有可能是发生tī大卫tú执政ê初期(参考五:17—18),若发生tī伊执政ê时,he就是大卫tú取落来耶路撒冷初期,非利士人无希望以色列所有支派联合起来成做一完整ê王国,就án-ne聚集军队tī利乏音谷ê所在,准备ài攻打大卫,hō͘伊来一个下马威。Á「收割ê时chūn」ê chit句话,thang续落去tī第11节提起ê非利士人攻打以色列,有一个重要ê用意,就是kah粮食ê需求kah控制有密切关系。Chit场两军对峙,是kah保护á是抢夺粮食有关。

Chit时chūn「一阵非利士人占了伯利恒」,已经侵入以色列人民siōng重要ê粮仓。就tī chit时chūn,有三个勇士真勇敢地无顾性命危险,闯过非利士人ê营区伯利恒城门边ê井里取水tńg来,beh hō͘大卫解除思乡之痛。这mā表示出两种意义:一是in bē了解大卫并m̄是真正想伯利恒ê水,却是想beh收复chit-ê城。二是in有能力闯入非利士人占领ê城,表示防守上有破痕。「大卫不lim」,因为ná水是三位勇士冒tio̍h性命危险chiah取到ê故乡之水,mā ē-sái讲是siōng珍贵ê水,伊beh kā chit-ê siōng珍贵ê水奉献hō͘上帝。表示siōng好ê、siōng珍贵ê奉献hō͘上帝。Koh khah重要ê,大卫kā它「当祭物献hō͘上主」,这表示大卫tī出兵chìn前举行祭典,向上帝祈求,伊向上帝chiù-chōa一定会攻落伯利恒。

重新查询 专卷研经 撒母耳记下系列
错误回报,请联系comm[@]fhl.net