撒母耳记下tùi第十九章40节开始，一直到第二十章止，lóng是讲tio̍h有关以色列民族内部南、北之间支派冲突问题。Chit种支派间ê不和谐，并m̄是始自大卫王朝，却是早tī雅各时代就已经发生。咱tùi雅各对gín-á ê偏爱ē-tàng看出来，尤其是伊对便雅悯支派ê宠爱，koh khah hō͘以色列族群彼此之间hō͘ m̄信任并存在tio̍h敌意。

第40到43节这短短几节经文，记载北部以色列支派ê人，认为大卫偏袒家己犹大支派ê人有所不满。Tio̍h注意chia ê「以色列人」是teh指北部十个支派，并无包括犹大支族ê人在内。Chit段经文mā是为第二十章便雅悯人叛变ê事件先作了预告。

第40到41节，当北方以色列族群主动表示欢迎大卫tńg来耶路撒冷重新执政，而犹大支派ê人却是得由大卫向祭司撒督kah亚比亚他提醒，koh再由两位祭司转告了后，chiah决定表态拥护大卫重新为王。「金罕kah王做伙」，这表示大卫确实履行了第38节所记载伊对巴西莱ê应允。Chit pái大卫beh过约旦河ê事，并无通知所有ê族群，只有大卫所属ê犹大支族参与chit项「护送」ê任务，这事件引起以色列支派ê人极大不满，因为án-ne，北部以色列支派ê人来向大卫抗议。

第42到43节，犹大支派ê人听tio̍h北部以色列支派代表不满，回答中表明大卫是in支派ê人。Koh讲，in mā强调án-ne做，并m̄是因为有任何「好康」，只是纯粹beh服事大卫王。M̄-koh chit种话听tī北方以色列支派代表ê耳中，说服力非常薄弱。因为án-ne以色列支派ê代表提出反驳ê理由，一则in人数远比犹大支派ê人chē。Chia ê「十倍」，意指北部有十个支派。Koh讲，chiah-ê以色列人强调是in tāi先支持大卫复辟王位ê族群，而且认为犹大支派ê chit种作法，是藐视in。M̄-koh「犹大人ê态度比以色列人koh khah强硬」，chit种态度就是所讲ê「硬拗」，kan-taⁿ会带来koh khah深ê误会kah冲突tī事无补。Á真正ē-tàng修复chit-ê积怨ê人就是大卫。M̄-koh伊显然放任chit-ê tāi-chì滋生。