撒母耳记下 16章15节 到 16章23节   背景资料  上一笔  下一笔
Tùi第十六章15节开始直到第十七章14节止,chit段经文就是teh描述一个tùi大卫身边叛变ê顾问亚希多弗,kah一直忠心tī大卫ê身边亲信户筛,in二人之间ê「斗智」经过。作者最后补上了一句押沙龙ê话,讲:「户筛ê建议比亚希多弗ê好。」就án-ne说明大卫会koh一pái tńg来到耶路撒冷重掌王权,而押沙龙最后则phah败仗来死。

Chit段经文主要teh说明亚希多弗án怎帮助押沙龙,hō͘以色列人民中知影,押沙龙确实是已经取代了大卫ê王权。Á伊ê建议是用当时中东地带普遍流行ê方式,就是kā前代王朝ê宫女接收成做家己ê妃嫔,而这tī以色列人民ê信仰中,看做是一种乱伦ê行为。

第15到17节,户筛看见押沙龙kah拥护伊ê随从进入耶路撒冷ê时,就赶紧出去迎接,并用真虚假ê话奉承押沙龙。Á押沙龙是一见面就用真讽刺ê话语问伊讲,为甚么无koh对大卫忠chiâⁿ了,意思是teh指户筛为甚么弃sak大卫。

第18到19节,这是户筛回答押沙龙ê话。户筛讲伊会án-ne留落来,是因为伊「忠于hit位被上主、人民,kah所有以色列人拣选ê人」,chit句话听tī押沙龙ê耳á一定真感动会信认为真。户筛是故意作态表示全力支持押沙龙,其实,伊真实ê目的是beh获取情报,是对老主人大卫效忠。

第20到21节,押沙龙想beh了解伊继承王位了后,应该做kóa甚么事?伊问亚希多弗ê意见。亚希多弗建议押沙龙去kah老父大卫ê妃嫔「困」,这是当时中东地带ê惯例,表示继承前朝所留落来所有权,bó͘ kah细姨表示全部权利(参考三:7,列王记上二:22)。亚希多弗会án-ne ê建议,其实就是beh hō͘押沙龙kah老父大卫完全断绝父子关系,这是非常残忍ê建议。M̄-koh chit种建议,已经破坏了原本摩西律法对以色列人民ê教导。Mā thang án-ne讲,押沙龙是拥有政权,却破坏了宗教信仰ê规律。Chit种伤害比夺tio̍h政权、拥有政权,对以色列人民造成ê伤害iáu koh khah严重。

第22到23节,果然,押沙龙听从亚希多弗ê建议,就tī大家金金teh看下tī王宫ê阳台顶kah大卫ê妃嫔同床,这m̄-nā是teh侮辱家己ê老父,mā等于是宣告伊kah大卫之间已经完全断绝à。作者有意说明一件重要ê信仰认知:当人自认为真聪明ê时,tī上帝看起来可能是愚笨ê;相对ê,当人忠实tī上帝ê话语,tī人看起来可能是愚戆ê,m̄-koh tī上帝眼中,he是聪明ê选择。过去大家lóng认为亚希多弗是真有能力、真聪明ê好幕僚,因为过去tī大卫王朝ê时代,亚希多弗bat是朝廷中lóng受尊崇,chit-má伊是受tio̍h押沙龙ê倚重。M̄-koh若m̄是出tī上帝ê旨意,人ê自认为聪明可能就是愚笨。

重新查询 专卷研经 撒母耳记下系列
错误回报,请联系comm[@]fhl.net