Chit章thang分做两部分，一是第1到16节，有一个亚玛力ê少年人来chhōe伊，kā伊讲关系扫罗kah约拿单ê死讯，大卫听tio̍h了后非常哀伤，特别是伊ê好朋友约拿单往生ê消息后，hō͘伊悲痛无停，m̄-koh当伊知影这少年人亲自kā重伤ê扫罗杀害后，气愤难消，马上ài随从凿死hit-ê通报ê亚玛力人。二是第17到27节，大卫为扫罗、约拿单ê死作了首诗记念。 

Chit段经文叙述有位亚玛力ê少年人来通报大卫，hō͘伊知影扫罗kah伊ê kiáⁿ约拿单lóng往生à。伊并且kā大卫讲，扫罗tī重伤teh beh往生前，伊听从扫罗ê话，kā伊凿死，为tio̍h beh证明伊所讲ê，koh kā扫罗ê王冠kah手股头上ê镯子hō͘大卫证明。结果大卫听tio̍h伊刣死扫罗，非常受气，kā伊判处死刑。Chit段经文主要teh叙述大卫怎样看待扫罗ê死讯，kah伊处理ê态度。撒母耳记作者一贯ê态度，就是beh敬重上帝拣选ê奴仆—君王、领袖，bē-tàng杀害（参考撒母耳记上廿四：6、10、廿六：9、11）。

Chit种资料kah撒母耳记上第三十一章ê资料有差别，因为án-ne，有圣经学者认为chit段经文是另外一个有关扫罗战死战场ê版本。

第1到2节，开始chia就讲「扫罗死后」，chit-ê时代大约是tī主前1010年左右。伊ê死mā同时说明伊ê朝代结束，一个新ê朝代teh beh来临，ná亲像约书亚记第一章1节所写ê「摩西死后」，新ê时代就是由约书亚领导。「大卫phah败亚玛力人」，chit件事记载tī撒母耳记上第三十章。Chit时ê大卫iáu khiā起tī洗革拉城。大卫tńg来到洗革拉城后ê「第三工」，有一个少年人tùi扫罗阵营中逃出来ê，伊是以色列国中ê「侨民」，伊用「拆裂了衫裤，掖灰tī家己头壳顶」，表示心中非常哀伤，而且以「坦覆 (thán-phak）tī土脚」chit种非常尊敬大卫ê态度来到大卫面前。

第3到5节，大卫接见伊，并且开始询问伊ê身分，当伊讲是「tùi以色列军中逃出来」，这已经充分说明以色列军队是战败了（参考撒母耳记上三十一：7）。伊而且hō͘大卫知影扫罗kah约拿单mā lóng死去，扫罗另两个kiáⁿ亚比拿达、麦基・舒亚mā lóng死去。大卫一听tio̍h是「扫罗kah约拿单」，特别koh再确认chit-ê青年án怎知影in两人ê身分。

第6到10节，chit段经文是chit位青年为tio̍h beh表示确认过扫罗ê身分，伊描述tāi-chì ê经过：(a)战争ê地点是tī基利波山。(b)伊带来扫罗ê武器：矛。这支矛扫罗常带在身边（参考撒母耳记上十八：10、二十：33、廿六：7、11、12）。(c)伊被扫罗看见并叫伊停落来。(d)扫罗ài chit位青年kā伊「凿死」。这原本是扫罗要求伊ê兵器侍卫官做ê事，m̄-koh扫罗ê侍卫官m̄敢做，结果扫罗家己坦覆 (thán-phak）tī家己ê刀上自刣来死（参考撒母耳记上三十一：4）。以上chiah-ê资料lóng thang确认扫罗ê身分。M̄-koh tī chiah-ê资料中比较需要注意ê一点：chia所讲ê kah撒母耳记上第三十一章4到5节所记载ê并无相仝，因为án-ne，有一个可能是扫罗自刣并无成功。M̄-koh chit位侍卫官却因为看见扫罗仆tī刀上，伊就认为国王已经死去，伊mā tòe自刣。因为án-ne，tī扫罗iáu有一点气息ê时，忽然看见家己ê士兵，就án-ne命令chit-ê亚玛力人ê以色列士兵kā伊刣死。不过mā有另外一个可能，就是chit-ê少年ê亚玛力人讲白贼，并无据实以告。伊可能看tio̍h扫罗已经死去，身躯仆tī刀上，就án-ne伊就上前取落来扫罗ê头壳顶ê王冠kah手股头上ê金镯子，想beh the̍h去向大卫邀功，认为án-ne thang欺骗会过大卫。因为扫罗既然无想beh死tī「未受割礼ê人」ê手上，伊怎样可能ài一个mā仝款是「未受割礼」ê亚玛力人来刣死伊？问题是chit位少年ê亚玛力人认为扫罗「横直活不了」，tùi chit句话就thang看出伊对扫罗是一点á敬意mā无。M̄-koh伊认为取落来扫罗头壳顶ê王冠kah手股头壳顶ê金环，thang取悦大卫，认为án-ne大卫会戴上王冠，自称做王。M̄-koh伊bē记得，chit种取落来国王头壳顶ê王冠kah手股头ê金镯子，是一种战胜者chiah会有ê动作。伊án-ne做，并m̄是心存敬意，却是带鄙视（siùⁿ）。

第11到12节，大卫听tio̍h chit-ê消息了后，悲痛至极地「拆裂了衫裤」，而且禁食到暗时，而且伊ê部属lóng kah伊仝款。过去bat有过两pái大卫本thang刣死扫罗，m̄-koh都无下手，只因为为扫罗是上帝所拣选ê君王。因为án-ne，大卫ê部属一定知影对上帝拣选ê君王，beh hō͘ in基本ê尊重。

第13到16节，tī第3节，大卫问chit-ê少年人是「tùi tó位来」？chit-má则问伊「tó位人」？而这少年人特别强调是「侨民」。大卫非常受气问伊「怎样敢刣上主所选立ê王」？这tī头前已经kúi-nā pái叙述过，chit-ê tāi-chì一直是大卫所强调万万bē-tàng行ê事。就án-ne大卫下令kā chit位来报信ê少年亚玛力人「刣死」。这kah伊原来ê想beh得tio̍h报酬（参考撒母耳记下四：10），结果tú好是颠倒。Tī大卫ê观点里，chit位亚玛力人所犯ê罪，等于是谋刣，严重性kah叛乱仝款。伊koh一pái强调绝对bē-tàng「刣死上主选立ê王」。其实，chit点mā是以色列文化中，非常重要ê一个基本信念：对上帝拣选ê奴仆，表达至koân ê敬意。Koh讲，若是大卫无chit种处置，伊可能会hō͘怀疑是伊派chit-ê亚玛力人去杀害扫罗，这会hō͘伊陷入困境中。因为扫罗虽然往生，m̄-koh伊ê kiáⁿ他施波设kah大元帅押尼珥iáu teh，必定会藉口煽动以色列人反tńg来对抗大卫。