列王纪下 9章1节 到 9章13节   背景资料  上一笔  下一笔
第九到十章lóng是记载有关以色列新ê王耶户被膏立ê经过,以及伊当政时代ê以色列政情。照列王记上第十九章16节ê记载,膏立宁示ê孙á耶户为以色列ê王ê chit项工作,原本是上帝ài先知以利亚去执行ê。M̄-koh先知以利亚iáu未达成chit项任务,就被接tńg来天顶à。chit-má由先知以利沙执行,而先知以利沙是派伊ê学生去执行chit项任务。

Chit章siōng主要是teh说明tī以利沙时代,上帝藉tio̍h耶户ê手,彻底kā亚哈王朝除掉,连同南国犹大kah北国以色列ê两个王,lóng因为kah亚哈有亲属关系,以及亚哈ê bó͘耶洗碧等,lóng tī同一时候被耶户hō͘除掉。这就应验ā上帝藉tio̍h先知以利亚所讲ê预言实现了(参考列王记上廿一:19、23)。

Chit段经文记载以利沙派门徒去膏立耶户为以色列王ê经过。原因是kah北国以色列王亚哈ê bó͘耶洗碧杀害上帝ê奴仆先知。因为án-ne,亚哈ê后代会为tio̍h án-ne付出代价。因为所有亚哈kah伊kiáⁿ ê chiah-ê恶质行踏lóng是「因为耶洗碧ê煽动」造成ê(参考列王记上廿一:25),特别是teh拜偶像ê事顶面koh-khah是án-ne。

第1到3节,chia所谓「少年ê先知」,指ê就是以利沙ê门徒。以利沙准备一瓶橄榄油ài伊ê学生到基列ê拉末去chhōe「宁示ê孙á耶户」,ài伊膏立耶户「作以色列ê王」,了后,就beh赶紧逃离hit所在。

第4到10节,chit-ê少年ê先知就án-ne去chhōe-tio̍h耶户,hit时耶户正kah一kóa军官teh开会。M̄-koh伊照以利沙ê吩咐,带耶户到另外一间无人ê房间,tī hia膏立耶户作以色列ê王,并对伊讲,ài伊去刣死亚哈ê kiáⁿ mā就是约何兰。Tio̍h用亚哈对待耶罗波安kah巴沙王ê家族hit种来对待亚哈ê家族。这mā说明上帝确实是会「报应」ê。其实,chit-ê少年ê先知所传达ê信息,是kā以前先知以利亚对亚哈王所讲ê话重述了一pái(参考列王记上廿一:21—23)。Mā可能tī先知「学校」训练课程中,已经kā上帝托先知所预言ê事列入了「教科书」中,列为传承使命ê功课。伊mā同时传达一个非常重要信息:chit种彻底铲除亚哈ê家族iáu koh khah包括伊ê bó͘耶洗碧在内。这少年ê先知照以利沙ê交带,完成chit项膏立kah交带ê话后,就赶紧逃离hit所在。

第11到13节,因为耶户是临时被这少年ê先知带离会议ê会场,当伊tńg来到军官会议现场ê时,其他ê军官问伊到底是甚么事?伊就kā伊被膏立为以色列王ê事kā in讲,结果,chiah-ê同事马上就kā in各自ê衫裤铺tī台阶顶面层,hō͘耶户khiā tī顶面,然后大声hoah讲:「耶户做王à!」以chit-má ê话来讲,这等于是政变。Chit种kā衫裤铺tī台阶顶面ê行动,后来tī新约福音记载耶稣骑驴á进入耶路撒冷ê时,门徒kah群众mā有类似ê举动(参考马可福音十一:7—8)。

重新查询 专卷研经 列王纪下系列
错误回报,请联系comm[@]fhl.net