列王纪下 5章1节 到 5章19节   背景资料  上一笔  下一笔
Chit章记载有关以利沙医患癞ko病ê叙利亚乃幔将军ê事迹,tī旧约圣经中ē-sái讲是一则非常顶港有名声下港有出名ê故事,mā是以利沙所行ê神迹中,siōng-kài大家所欢喜ài讲ê神迹。

Chit段经文讲述叙利亚乃幔将军患tio̍h癞ko病,因为厝里有一个tùi以色列掳来当女婢ê细汉cha-bó͘-gín-á,经过chit-ê女婢ê建议,伊讲以色列ê先知以利沙thang医伊。伊听从了chit位以色列小女婢ê话,身上ê癞ko病因为án-ne得tio̍h痊愈。

第1到4节,tī第1节就记载「因为上主bat藉tio̍h伊hō͘叙利亚军队获胜」chit句话,koh再对照列王记上第十九章15节,上帝ài先知以利亚到大马士革去「膏立哈薛作叙利亚王」,说明列王记作者ê想法,上帝乃是所有族群ê上帝,m̄-nā是以色列人民ê上帝而已。Chit种观念tī先知运动中一再出现,上帝会差遣亚述帝国成做奴仆,替他打击选民以色列背叛行为(参考以赛亚书十:5—6,耶利米书第廿一章、廿五:9)。

癞ko病,这是以色列人民看做siōng危险ê病,甚至认为这是一种「天谴病」,是上帝ê惩罚,无可能得医。而且照摩西律法规定,一定tio̍h Kā chit种人tùi社区中隔离出来,因为是无清气ê记号(参考利未记十三:45—46)。

Chit-ê以色列少女知影主人患tio̍h án-ne ê病症,就向女主人建议,去chhōe「撒马利亚ê hit-ê先知」,真坚定ê语气讲「伊一定会医好伊ê癞ko病」。Chit位以色列女婢会án-ne建议,一定是听过以利沙所行ê神迹。因为án-ne,乃幔将军听了后,就去面见国王报告chit-ê tāi-chì。

第5到7节,叙利亚王听了后,就写封phoe hō͘ 乃幔带,chit张phoe是beh以色列国王帮忙医乃幔将军ê癞ko病。然后家己准备「三万块银á,六千块金子,kah十套衫裤」当做礼物。这确实是一笔庞大ê礼金,就án-ne去见以色列国王。国王一phah开叙利亚王ê信,就吓到差不多崩溃。因为伊深知影chit种天谴病,除了上帝以外,无任何人ē-tàng医好。M̄-koh soah koh惊叙利亚王藉口伊无医好乃幔将军ê病,而派军队来攻打以色列。

第8到12节,以利沙听tio̍h国王án-ne悲伤就拆裂衫裤,就派人去kā国王讲,ài乃幔将军去chhōe伊。原因是beh hō͘ 乃幔将军知影,tī以色列「有一个先知」,chit句话已经teh表明,叙利亚若想beh侵犯以色列,ài beh特别小心,因为chit位以色列先知会kā上帝ê旨意带hō͘以色列人民。上帝是以色列人民ê保护者。Á当乃幔将军来到以利沙ê厝门口ê时,伊并无去开门,却是叫奴仆去kā乃幔将军讲,ài伊直接去约旦河「洗七pái」,án-ne病就会好起来。乃幔将军对以利沙用chit种态度回应伊,感觉非常愤怒,伊认为至少先知也tio̍h出来接见伊,tī伊身上行个宗教礼仪。Koh讲,伊认为若是去约旦河洗七pái,不如tī家己国家叙利亚ê「亚罢拿河kah法珥河」lóng会比约旦河来得清气。伊显然bē记得先知ê话,代表ê是上帝ê信息。Kah河水是m̄是洁净无关系。

第13到15节,佳哉,乃幔身边有一个奴仆劝伊m̄-thang受气,tio̍h听从先知ê话。何况只是去约旦河洗洗就会洁净,就án-ne 乃幔将军听chit-ê奴仆ê话,就去约旦河洗七pái。果然,伊身上ê癞ko病全lóng消除,而且iáu带所有跟tòe ê奴仆去见以利沙,并且见证讲「全世界只tī以色列有上帝,无别ê」。伊ê chit句话其实mā teh说明先知teh代表上帝ê旨意。伊同时请以利沙kā礼物收下。其实,乃幔将军kah伊ê奴仆所讲ê话,kah实际行动等,lóng teh反应以色列国王kah人民比起chit位乃幔将军kah伊ê奴仆lóng iáu koh khah hâm-bān。因为上帝拣选ê以色列人民并无听从上帝忠实奴仆先知ê话语,m̄-koh外邦人却听从。

第16到19节a句,以利沙坚持拒绝接受乃幔将军所beh赠送ê厚礼酬金。因为伊只是负责传达上帝ê话语。为tio̍h án-ne,乃幔将军请求以利沙hō͘伊带两袋ê以色列土tńg来叙利亚去。伊决定只敬拜chit位透过先知传达hō͘伊消息、医好伊ê癞ko病ê神。第17节mā说明古代人对神ê观念,in认为tio̍h beh敬拜in所认bat ê神,就一定tio̍h kah该神所掌管ê土地连做伙,mā就是该神所khiā起ê土地。因为án-ne,乃幔将军beh带tńg来以色列ê土,为tio̍h是beh做敬拜ê路用。M̄-koh伊mā清楚知影,家己无办法拒绝陪伴国王去拜叙利亚ê「临门」神明。其实,伊chit种态度是矛盾ê,既然认为以利沙ê chit位神明是真实ê,而且伊讲bē向任何神明献祭,chit-má koh讲伊有困难,是为tio̍h beh陪国王去膜拜临门神明,而这是为tio̍h政治ê理由ê需要。就án-ne,以利沙祝福伊,乃幔将军就án-ne离开tńg去厝里。

重新查询 专卷研经 列王纪下系列
错误回报,请联系comm[@]fhl.net