Chit段经文是描述约哈斯kah约雅敬chit两个王ê情形，in lóng是tī埃及管辖之下ê傀儡君王。

第31到34节，chit段经文是关系约哈斯继任为王ê记载，非常可惜ê是，伊无kā老父约西亚王所努力一生ê铲除偶像神明崇拜ê事hō͘保存落来，颠倒，伊是学习玛拿西王ê pháiⁿ模样，「做上主看做邪恶ê事」。因为约西亚王ê战败，约哈斯kan-taⁿ继位三个月ê时间，就被埃及王尼哥二世hō͘俘虏伊去。M̄-nā án-ne，埃及iáu因为约西亚派兵phah埃及，要求索赔军事费用chē kah「三千四百公斤银á kah三十四公斤金子」，这致使原本已经m̄是真强壮ê犹大国势koh一pái衰退落去。

注意第34节，chit节讲埃及国王尼哥二世立约哈斯ê kiáⁿ以利亚敬为犹大王，并且koh kā伊ê名改为「约雅敬」。Chit种「改名」、「号名」，所代表ê意思，是犹大顺服了ê意思。Mā就是犹大成做埃及帝国ê附庸国。

耶利米书第廿二章10到12节，有先知耶利米所提起ê关系约哈斯之情景，就是hō͘掠到埃及去，就一直到死都无被tháu放tńg来。

第廿三章35到37节，chit段经文是约雅敬在位执政ê情景，chia讲伊继位ê时廿五岁，统治了十一年。为tio̍h beh赔偿埃及ê军费，伊koh一pái增加税赋，hō͘人民生活koh khah困苦。仝款ê，伊mā是继续伊兄弟约哈斯ê pháiⁿ模样，带领人民去拜偶像神明。

Koh khah乱讲ê是，当国家tio̍h赔偿chiah-ni̍h大笔ê钱hō͘埃及ê时，伊除了向人民课重税外，却iáu奢华到建造雄伟ê皇宫，m̄-nā贪图家己ê利益，而且做出「流了无辜ê血，以暴力压制人民」ê事（参考耶利米书廿二：13—17），莫怪chit种国家会灭亡，人民会hông掠去做奴隶。