列王纪下 21章1节 到 21章18节   背景资料  上一笔  下一笔
Chit章记载南国犹大面临毁灭ê前兆,希西家王ê kiáⁿ玛拿西继承伊ê王位,m̄-koh伊却无跟tòe老父希西家学习做上帝看做对ê事,却是弃sak上帝ê话,去拜偶像神明。Tī玛拿西ê身上,看tio̍h ê就是极大ê恶例,m̄-nā kā in父亲希西家苦心所建立起来ê信仰典范kā它废除,iáu改变到差不多完全颠倒ê状况,m̄-nā拜偶像,而且kā家己ê kiáⁿ当烧化祭献hō͘偶像神明。Koh khah令上帝无法度忍受ê,是kā亚舍拉女神ê柱像khǹg tī圣殿里,这m̄-nā是teh污秽圣殿,mā kah当年所罗门王建造圣殿ê目的完全颠倒,明明是就是tī侮辱上帝ê神圣。伊以残酷ê手段对待人民,koh khah买命ê是án-ne ê国王,竟然ē-tàng统治长到五十五年,ē-sái讲是犹大王国掌权siōng久ê一位恶质国王。

是甚么原因hō͘玛拿西一登基就马上kā老父希西家王所辛苦建立ê信仰基业kā它废除,而且是完全ê改变?有kóa圣经学者认为是因为伊想beh讨好亚述帝国,减缓压力,因为án-ne,引进了亚述帝国敬拜偶像神明ê宗教信仰。Tī第十七章记载亚述帝国消灭了北国以色列后,就故意kā外族人引进撒马利亚,kā以色列人民四散tī其它城邦khiā起,除了是通婚ê政策外,另外就是beh破坏in tī宗教信仰上ê洁净。因为án-ne,tī第十七章41节讲:「Án-ne,chiah-ê 列国mā 敬畏上帝,mā 服事in ê 偶像。in ê kiáⁿ,in ê 孙,mā lóng 是án-ne,in ê 祖先所行ê, 到今á 日in mā 照án-ne 行。(全民版)」简单ê一节经文,却讲出亚述帝国tī phah乱以色列人民对上帝ê信仰是成功ê。玛拿西惊惶亚述,恢复in父亲希西家王所废掉ê一切偶像神明,可能就是为tio̍h取悦亚述帝国,m̄-koh,惊人m̄惊上帝,chiah是真正ê问题所在!玛拿西chit种举动,hō͘上帝无法度忍受,mā为犹大ê沦亡带来主因。

Chit段经文mā同时记载tī历代志下第三十三章1到20节。无论在列王记作者á是tī历代志ê作者lóng仝款写落来chit句话:「伊大大犯罪,对敌上主,激发上主ê愤怒。」chit两本经册作者lóng讲:「犹大人民m̄听从上主ê命令。玛拿西领in犯罪,比上主tùi伊子民面前赶出去ê本来住民所犯ê罪iáu koh khah严重。」chiah-ê话为南国犹大ê灭亡写落来注脚。Mā因为弃sak上帝,á是讲根本就m̄相信有上帝,因为án-ne,tī玛拿西手上「刣死真chē无辜ê人民,hō͘耶路撒冷街路流满血」,这是上帝无法度赦免玛拿西ê另外一个原因(参考列王记下廿四:4)。

第1到2节,玛拿西ē-sái讲是南北两国国王执政siōng久长ê一位,共计有五十五年,m̄-koh却mā是siōng惨ê一位国王。伊「做上主看做邪恶ê事」,是比过去迦南地ê人所做ê行为koh khah 可恶。

第3到7节a,chit段经文真详细描述做toh一kóa上帝看做非常邪恶ê事,包括有:重建拜巴力kah亚舍拉偶像,以及建筑chit种偶像神明ê祭坛;而且kā家己ê kiáⁿ烧献hō͘ chiah-ê偶像神明;行占卜、巫术、求问算命ê、通灵ê;koh khah 可恶ê是kā亚舍拉女神ê柱像khǹg tī圣殿中,这等于是teh侮辱上帝ê神圣。Ná亲像头前所叙述过ê,伊会án-ne做,是为tio̍h beh讨好亚述帝国。伊án-ne深惊亚述帝国ê原因,真可能就是亲像历代志下第三十三章11节所讲ê「亚述军队ê 将领侵犯犹大。In掠tiâu玛拿西,用鈎子鈎伊,铜链子锁伊,带伊到巴比伦去」,这hō͘伊惊惶到极点,m̄-koh却m̄知伊严重背离上帝ê作为,是惹了上帝极大愤怒ê原因,mā种下了犹大灭亡ê主要因素。

第7节b到9节,这是有关上帝对所罗门王建造耶路撒冷圣殿表达ê看法,圣殿是以色列十二支派人民共同敬拜ê场所,m̄-koh若是大家会遵守上帝ê诫命,上帝会伸手庇护in所khiā起ê土地。M̄-koh可惜ê是,玛拿西并无án-ne做。

第10到12节,chit三节指出上帝有差遣奴仆先知去传达上帝警告ê信息hō͘玛拿西,m̄-koh真显然地玛拿西并无听从众先知ê话,iáu-koh带领犹大人民弃sak上帝。因为án-ne,上帝决定beh降灾祸到「耶路撒冷kah犹大,hō͘每一个听见chit项事ê人lóng吓呆」,这真清楚讲出上帝beh降ê灾祸必定是非常严重。

第13到15节,上帝奴仆先知ê信息tī chia真清楚指出,上帝「惩罚耶路撒冷」ná亲像「惩罚撒马利亚仝款」,chit种信息已经真清楚指出,上帝会摧毁耶路撒冷。而且m̄-nā是án-ne,连国王kah人民lóng会亲像亚哈王朝仝款,就是王朝ê后代会被消灭殆尽,人民会hông掠去做奴隶。

注意第14节所提起「残存ê人民」,这原本是希西家王向上帝祈祷ê时所讲ê,祈求上帝看顾chiah-ê kan-taⁿ存ê选民(参考列王记下十九:4)。chit-má上帝奴仆先知所传出ê信息,却讲上帝连chiah-ê残存ê人民mā tio̍h放弃,kā in交hō͘仇敌。这mā充分显示上帝已经boài chiah-ê悖逆他ê选民。

第16到18节,chit段经文说明上帝决定beh摧毁玛拿西王朝,因为伊m̄-nā领人民弃sak上帝,mā杀害真chē无辜人ê血。就tī伊治理长到五十二年了后死去,由伊ê kiáⁿ亚们继位。

重新查询 专卷研经 列王纪下系列
错误回报,请联系comm[@]fhl.net