列王纪下 2章1节 到 2章18节   背景资料  上一笔  下一笔
Chit章主要记载上帝忠实奴仆先知以利亚离开人间,hō͘ 上帝接tńg来天家,以及伊ê学生以利沙续接伊ê工作之情形。

Mā是tùi chit章开始,一直到第八章15节止,lóng是记载有关以利沙ê事迹。

Chit段经文记载先知以利亚hō͘ 上帝接tńg来天家ê经过,同时记载以利沙继承以利亚为先知工作ê一段重要记事。Tī chit段经文中,thang看tio̍h先知以利亚怎样训练先知以利沙,前后三pái,伊lóng tio̍h以利沙停止跟tòe伊。Ná亲像耶稣mā是án-ne,对hiah-ê想beh跟tòe伊ê人讲:「狐狸有孔,空中ê飞鸟有巢,独独人子连khòa 头壳ê 所在都无。(全民版)」(路加福音九:58)有人则因为听tio̍h耶稣传讲ê道理感觉真oh接受而离开(参考约翰福音六:66)。Tùi chia ē-tàng看出先知以利沙有非常坚定ê信心,坚持beh跟tòe先知以利亚去,结果伊成功地完成了chit段长途ê旅途训练,mā完成了伊ê心愿――成做先知以利亚ê继承人,同时得tio̍h上帝赏赐hō͘伊ná亲像先知以利亚ê能力。

第1到2节,chia提起先知以利亚身边有一个跟随者以利沙。照列王记上第十九章16节ê记载,上帝bat命令先知以利亚膏立「亚伯・米何拉人沙法ê kiáⁿ以利沙接替」伊作先知。chit-má作者讲上帝beh「用旋风接以利亚升天」,这mā是圣经中所有先知siōng特别ê一位。当in两人tùi「吉甲」出发,tī路上ê时chūn,先知以利亚就ài伊ê子弟以利沙mài跟tòe伊去,伊接获上帝ê命令,beh去伯特利。Chia mā是上帝向雅各显现ê所在(参考创世记廿八:10—19)。M̄-koh以利沙坚持beh跟tòe以利亚到伯特利去。

第3到4节,chia讲「有一阵伯特利ê先知」,这表示chit地区有一个「先知学校」。In kah-ná lóng听tio̍h上帝beh接先知以利亚tńg来天家ê信息。因为án-ne,in向以利沙提出chit-ê问题。M̄-koh以利沙并无想beh谈chit-ê tāi-chì。Á先知以利亚第二pái要求以利沙停止跟tòe。M̄-koh以利沙坚持beh继续跟tòe伊。

第5到6节,这是第二pái有一阵来自「耶利哥ê先知」,这表示tī耶利哥mā有「先知学校」ê设立。Koh再对照第7节、第15节来看,知影chit群先知共计有「五十名」之多。In向以利沙提出kah伯特利hit群先知仝款ê问题。以利沙ê回应mā仝款,无想beh谈chit-ê tāi-chì。就tī chia,先知以利亚koh一pái ài以利沙停止跟tòe。M̄-koh以利沙lóng是用真坚定ê语气表示一定会跟tòe,绝对bē离开。

第7到8节,chia讲有「五十个先知kah in到约旦河」,tùi第15节知影chiah-ê先知是tùi耶利哥出来ê。Tī chia讲先知以利亚以伊ê外袍打击约旦河,河水就分开,伊kah子弟以利沙行过约旦河,这mā teh表示这是tī五十个先知ê面前发生ê神迹,in lóng亲目看tio̍h。

第9到10节,先知以利亚看见以利沙坚持跟tòe伊,就án-ne问伊tī hō͘ 上帝接tńg来天家chìn前,ē-tàng为伊做甚么tāi-chì?以利沙祈求先知以利亚ē-tàng kā能力加倍hō͘伊。因为伊beh继承先知以利亚ê工作。M̄-koh先知以利亚知影,伊身上ê能力并m̄是伊家己ê,却是上帝赏赐ê。因为án-ne,伊真清楚回答he是「真oh答应ê要求」。M̄-koh伊hō͘以利沙一个记号,就是若伊ē-tàng看见伊升天,就表示伊身上有chit种能力。

第11到14节,就tī in一面行一面谈话ê时,忽然tùi天顶降落一台火马拉tio̍h ê火焰车,kā先知以利亚接tio̍h天顶去,这mā为后来先知玛拉基tī预言终末审判来临ê时,上帝beh先差派先知以利亚来临ê记事,留落来一个伏笔(参考玛拉基书四:5)。

当以利沙看见此景象ê时,ná mā表示伊身上已经拥有先知以利亚ê能力à。伊kā家己ê衫裤拆裂做两半,表示不舍老师先知以利亚离开伊,mā同时kā先知以利亚身上lak落来ê hit件兽皮外袍拾起来,伊用chit件兽皮外袍打击约旦河,果然河水就分开,然后伊koh行过河底到对岸去。Tī历代ê先知中有án-ne能力ê人,除了摩西、约书亚外,koh来就是先知以利亚,续落来就是以利沙。

需要注意ê是,以利沙是m̄是ē-tàng成做先知,这m̄是用先知学校(亲像第3、第5、第7节等等),á是「师徒」之间ê相授thang成事,因为真正先知是上帝ê奴仆,是上帝亲自拣选ê。这就是先知以利亚kā以利沙讲,伊唯一thang hō͘伊ê是hō͘伊知影上帝ê旨意,这旨意是透过「记号――亲目看见伊被接到天顶去」(第10节),就表示伊已经hō͘ 上帝所拣选。

第15到18节,这五十个来自耶利哥ê先知,因为亲目看见发生tī in目睭前ê神迹,ē-sái讲是in怀疑先知以利亚并m̄是tńg去到天顶,而可能是hō͘上帝ê旋风吹到「山顶á是山谷里」。因为án-ne,in kā以利沙讲tio̍h去chhōe先知以利亚。虽然以利沙阻止in,in iáu是beh去,结果是甚么都无chhōe tio̍h。不过in lóng因为亲目看见以利沙ē-tàng分开约旦河ê河水,而确信先知以利亚ê能力已经tī以利沙身上à。


重新查询 专卷研经 列王纪下系列
错误回报,请联系comm[@]fhl.net