Chit段经文是记载有关犹大王约坦ê记事。Chit段记事mā记载tī历代志下第廿七章1到9节。对照两处经文ê记事，就thang发见约坦确实是一个有实力ê统治者，tī伊统治南国犹大期间，bat出兵攻打亚扪人，而且phah败in，并且强迫亚扪人像伊进贡三年，每年tio̍h缴交「三千四百公斤银á，一千公吨小麦，一千公吨大麦」等。历代志作者用chit句话形容伊：「约坦一工比一工强盛，因为伊忠实地顺从上主—伊ê上帝。」ná亲像列王记作者tī chia所讲ê，伊「效法in父亲ê模样，做上主认为对ê事」。Chit种描述，tú好kah北国以色列ê历代君王完全颠倒。

第32到35节，短短ê几节经文，讲出久长以来一直无改变ê现象，就是kah chìn前祖先仝款，无kā人民已经是根深蒂固拜偶像神明ê事hō͘除灭，因为án-ne无法度带领全国人民专心一意敬拜上帝。不过，至少伊是忠实tī上帝ê。只是人民拜偶像ê事，已经是积年thiám月ê老习惯，无强力执行铲除，就会tī民间落根生长。Koh讲，tī伊执政期间，伊tī国防要务上确实是下了功夫，伊kā圣殿ê北门防卫工程建造完成。历代志作者讲伊koh tī耶路撒冷ê俄斐勒扩建城墙，mā tī犹大山区建设城镇，tī山林内建造堡垒kah了望台等，chiah-ê lóng是kah国防基础有密切关系。

第36到38节，伊统治犹大十六年。M̄-koh无想tio̍h tī伊治理期间，叙利亚王利汛kah北国以色列王比加联盟攻打犹大，主要目的是beh犹大mā加入in ê联军，反抗亚述帝国扩大版图ê举动。M̄-koh犹大因为m̄敢得罪亚述，结果以色列kah叙利亚出兵惩罚无加入联军ê犹大。