列王纪下 15章1节 到 15章7节   背景资料  上一笔  下一笔
Chit章主要lóng是teh记录北国以色列政情动荡ê情景,包括有撒迦利雅王(第8到12节)、沙龙王(第13到16节)、米拿现王(第17到22节)、比加辖王(第23到26节),以及比加王(第27到31节)等。其它第1到7节是记载犹大王乌西雅,以及第32到38节有关约坦王ê记事。

因为犹大王乌西雅执政ē-sái讲是南kah北两国历任国王在位siōng久长ê一位,长到五十二年时间,伊一个人执政时间thang抵得上北国以色列kúi-nā位国王。这mā表示tī乌西雅王执政ê时期,犹大国ê政局ē-sái讲是非常稳定ê,这无论是过去á是chit-má ê国家来讲,lóng是真重要ê基础。

有关乌西雅王ê事迹,tī历代志下第廿六章mā有详细记载chit位国王所做ê各项事迹。Tī中文《和合本》ê记载,kā乌西雅ê名用「犹大王亚玛谢ê kiáⁿ亚撒利亚登基」,m̄-koh tī历代志则写做「乌西雅」。《现代中文译本》无论是在列王记chia,á是tī历代志lóng是用「乌西雅」。照历代志作者ê资料,伊确实是一个真有成就ê君王,包括:phah败非利士人,hō͘亚扪人向伊降服、进贡,开挖水井,鼓励人民开垦土地种植葡萄园,并且强化国防力量。不过却mā因为国家强盛,心内开始骄傲起来。因为对圣殿ê祭司不敬,kā原本只有祭司chiah thang做ê祭祀工作,家己担当。结果致使癞ko病,mā因为án-ne hō͘伊无法度koh再进入圣殿敬拜上帝,国政是由伊ê kiáⁿ约坦负责。

第1到2节,「以色列王耶罗波安二世在位ê第廿七年」,chit年大约是tī主前767年。当时伊乌雅王是「十六岁」,前后共计执政「五十二年」,chiah-ni̍h久ê时间,是tùi主前792年开始起算是伊kah老父亚玛谢同齐执政,直到主前767年开始,这年伊独自执政是到740年止。

第3到5节,tī第3节chia讲乌西雅效法in父亲亚玛谢ê模样,「做上主认为对ê事」,chit句话mā thang对照第十四章3节。可惜,就是无kā犹大境内以色列人民崇拜偶像ê事完全除去。头前已经有提起过,乌西雅王ê成就真大,m̄-koh却mā因为án-ne而骄傲起来。历代志下第廿六章16到21节记载伊擅自进圣殿tī香坛顶烧香,而这是只有大祭司chiah thang进入ê所在,虽然当时有亚撒利亚祭司带八十个祭司去阻止伊,并且提出警告。伊却tī圣殿香坛ê所在对chit群祭司发大怒,结果就出现癞ko。列王记chia讲伊「一生受这病ê纠缠」,国家大事只好交由伊ê kiáⁿ约坦处理。第5节chia所讲ê「tòa tī家己ê行宫」,意思是teh指伊已经因为患有癞ko病ê缘故,被隔离出来à(参考利未记十三:46)。

第6到7节,就án-ne,乌西雅直到死去ê时chūn,lóng是tī癞ko病ê纠缠下过日子,ē-sái讲是非常痛苦。伊ê kiáⁿ约坦继任伊ê王位。Á约坦tī主前750年就开始接落国家大事,直到老父乌西雅tī主前740年往生。

重新查询 专卷研经 列王纪下系列
错误回报,请联系comm[@]fhl.net