Chit段经文是记载耶户开始进行铲除亚哈时代所建立ê巴力神明崇拜，伊tāi先下手处置ê对象，是hiah-ê kā巴力当做真神崇拜ê人民，有淡薄á有thâi鸡儆猴ê用意在内，beh hō͘ hiah-ê想beh拜巴力ê人民懔neh。

第18到21节，作者真清楚讲耶户用「计谋」，为tio̍h是beh「刣死所有拜巴力ê人」。因为án-ne，伊ài撒马利亚城内所有巴力ê信徒，特别是巴力ê先知、祭司等人lóng一定tio̍h出席。耶户是假做讲khah强化对巴力崇拜ê信仰，ài顶面所讲chiah-ê人一定lóng得出席。就án-ne，chiah-ê巴力ê先知、祭司、众信徒lóng聚集到巴力神庙。

第22到24节，耶户带利甲ê kiáⁿ约拿达mā进入巴力神庙中，koh一pái进行宣告，只有拜巴力ê人chiah thang tī庙宇内，而且为tio̍h防止滥刣无辜ê之故，伊特别命令chiah-ê信徒、祭司、众先知lóng一定tio̍h穿祭祀巴力神明ê时ê衫裤，来当做辨识ê路用，因为伊已经埋伏了八十个杀手，准备ài杀害chiah-ê人。Á伊kah约拿达则假做带头祭拜巴力。

第25到27节，果然，当伊kah约拿达tī祭祀典礼结束了后出来，就下命chiah-ê杀手进入庙内kā所有ê人lóng刣死。并且进一步kā所有ê神像lóng搬出来烧毁。

其实mā thang án-ne了解：耶户chit种残酷ê大屠杀动作，mā同时削弱了以色列ê国力，因为必定有真chē菁英mā tī chit pái ê屠杀中丧失性命。后来耶户ê chit种大屠杀行为被先知何西阿严厉谴责。先知何西阿传出上帝ê信息讲：「Kā 伊号名叫做耶斯列；因为koh 一时á，我beh 办耶户ê 家tī 耶斯列刣人流血ê 罪，mā beh hō͘ 以色列 ê 子民 ê 国无去。(全民版)」（何西阿书一：4）原因可能是因为上帝以耶户当做惩罚耶洗碧ê恶行，m̄-koh，耶户并无好好á执行「上帝ê律法」，后来伊mā变了心像耶罗波安仝款带领人民弃sak了上帝，去拜偶像。

第28到31节，虽然耶户铲除了巴力偶像神明ê崇拜，m̄-koh家己却无先洁净家己，hō͘家己重头tńg来耶和华上帝ê面前，伊是用开国元老耶罗波安ê模式，继续带领人民拜金牛，其实chit种金牛崇拜kah伊所铲除ê巴力神明是仝款ê，lóng是迦南人所看做生产ê神。因为án-ne，上帝并无应允hō͘伊ê后裔永远统治北国以色列，却是只有到第四代。

第32到36节，一pái政变后就开始大屠杀人民，对一个社会、国家、民族来讲，并m̄是正确ê行为，一定会hō͘真chē无辜ê人受害，mā ē-sái真chē有识之士噤若寒蝉。Ná亲像先知阿摩司所讲ê：：「通达ê 人看tio̍h chit 款时势，伊会恬恬无讲话，因为时势真bái。(全民版)」（阿摩司书五：13）头前讲过，chit种大屠杀ê结果，就是国势衰弱落来。Chia讲上帝缩小了北国以色列ê版图。Tī约旦河东岸ê土地，真chē所在被叙利亚占领。耶户就án-ne统治了北国以色列长到「二十八年」时间。