列王纪下 1章1节 到 1章8节   背景资料  下一笔
Chit章是继续上卷第廿二章51到53节简略绍介亚哈王ê kiáⁿ亚哈谢继任为王了后,伊弃sak上帝ê记事。

Chit段经文描述以色列ê王亚哈谢kah先知以利亚之间ê冲突。原因是以色列ê王一再带领人民去拜偶像神明,弃sak上帝。

第1节,chit节开始就讲亚哈王往生后,摩押国就趁机会背叛北国以色列ê统治。摩押国是tī大卫时代成做以色列ê附庸国(参考撒母耳记下八:2)。后来,摩押每年tio̍h向以色列进贡十万只小羊kah十万只公绵羊ê毛。摩押王米沙敢公然背叛北国以色列ê统治(参考列王记下三:4—5),可见以色列目前ê情况是teh衰微中。

第2到4节,亚哈ê kiáⁿ亚哈谢继任为王后,因为不慎tùi王宫顶上ê阳台摔落来而受tio̍h重伤。伊派人去求问非利士人五大城市之一ê以革伦神明「巴力・西卜」,看是m̄是ē-tàng康复。Chit-ê神明tī新约福音书中被称做「鬼王」别西卜(参考马可福音三:22)。Chit-ê神明mā是tī迦南地ê人民siōng欢喜崇拜ê神,hông称做「胡蝇王」,in认为这神明真有能力,thang医百病。Tùi第2节thang看出以色列人民背叛上帝ê情形是非常严重ê,连国王出状况lóng去询问非利士人ê神明,hit人民就koh-khah免讲à。M̄-koh上帝ài先知以利亚去质问亚哈谢派去ê奴仆,为甚么无问上帝,却去问非利士人ê神明。并且ài先知以利亚直接就kā亚哈谢ê奴仆讲亚哈谢「一定会死」。上帝忠实ê奴仆先知,无论是jōa-ni̍h-á危险,只要上帝命令出来,就一定tio̍h照án-ne去做。以利亚确实遵照上帝ê命令去kā亚哈谢ê奴仆讲。

第5到8节,亚哈谢ê奴仆听tio̍h先知以利亚所讲ê话,就知影大事不妙,就án-ne随时tńg来宫廷去秉告hō͘亚哈谢王。亚哈谢问奴仆所遇tio̍h ê人是生做「甚么款ê」。当奴仆回答讲chit-ê人「穿插兽皮外袍,束tio̍h皮带」。Chia ê「兽皮外袍」,iáu有另外一个意思,是teh指伊ê身上有真chē毛,这是伊ê特徵。当亚哈谢一听tio̍h这特殊记号,随时就知影是上帝忠实ê奴仆以利亚。

Koh讲,先知以利亚ê打扮,说明伊是属tī顶真离俗派ê先知。伊ê chit种打扮后来就成做顶真、离俗派修士ê生活样式,过非常简朴ê生活。新约时代ê行洗礼约翰mā kah先知以利亚仝款,食草蜢、野蜜,穿骆驼毛ê衫裤(参考马可福音一:6)。

重新查询 专卷研经 列王纪下系列
错误回报,请联系comm[@]fhl.net