历代志下 35章1节 到 35章19节   背景资料  上一笔  下一笔
Ná亲像伊ê a祖希西家改革ê时所做ê仝款,约西亚mā是带领人民遵守Pôaⁿ过节,透过守chit节期,表明上帝chiah是真正in性命ê主,是kui个以色列民族生存ê óa靠。

Chit段经文记载约西亚除了下令tio̍h祭司、利未人忠于职守,全心全力tī圣殿执行in ê任务,而且ài全体人民遵守Pôaⁿ过节,伊beh亲自带领以色列人民遵守Pôaⁿ过节,这kah伊ê阿公希西家仝款(参考第三十章)。

第1到2节,约西以照摩西律法规定ê每年正月14日就是守Pôaⁿ过节ê时间,并且下令众祭司tī圣殿中执行任务。

第3到5节,chia讲约西亚下命令,m̄-thang koh再移动约柜,这表示约柜bat被移动过,真可能是因为tī玛拿西时代,因为kā偶像神明khǹg入去圣殿,致使in为tio̍h维护约柜ê「圣洁」,而kā约柜「藏」起来!约柜kah守Pôaⁿ过节,对kui个以色列民族来讲必定有非常ê意义,因为这两项lóng是表明in kah上帝之间有bē-tàng分离ê关系。然后伊命令祭司kah利未人lóng tio̍h遵守祖先大卫王kah所罗门时代所订立ê职责去办理in应该有职分。M̄-nā án-ne,为tio̍h beh彻底实行chit项守Pôaⁿ过节ê规例,伊iáu beh祭司kah利未人去帮助每一个家庭执行chit项「洁净人民心灵」ê工作。Á chia所讲ê「以色列ê每一个家庭」,指ê是m̄-nā tī南国犹大,甚至包括北国以色列人民ê家庭。

第6到9节,为tio̍h beh发动全体人民尊守Pôaⁿ过节,约西亚家己「捐出三万只绵羊、小羊、小山羊,kah三千头公牛」。因为有伊带头捐献,因为án-ne伊ê臣仆mā自然tek kah进,其他大祭司、祭司、利未人领袖等lóng跟tòe捐献。这mā说明tī上位者,若是用身作则,身边ê臣仆mā会跟tòe学习。

第10到15节,chit段经文thang看出约西亚执行Pôaⁿ过节ê礼仪,是非常有计画,而且按照律法册上ê规定按部就班地做。伊m̄准祭司kah利未人是tòe性,á是用应付ê态度,却是顶真地执行每一个动作。Chiah-ê祭司kah利未人mā照规定kā献祭过ê cheng-seⁿ分hō͘人民。然后利未人来为家己kah祭司预备需要ê一切。大家lóng有份,bē有人欠缺。

第16到19节,ná亲像chia所讲ê,因为约西亚坚持遵守律法册上ê规定,因为án-ne,所有一切礼仪就kah-ná tńg来到古老时代。时间长到七工,全体以色列人民lóng欢喜庆祝Pôaⁿ过节kah除酵节。这mā是tùi先知撒母耳时代以来,未bat有过chiah-ni̍h顶真ê态度守Pôaⁿ过节à。这表示约西亚所做ê,远比伊ê a祖希西家iáu koh khah彻底,ē-sái讲是一个非常难得ê君王。

重新查询 专卷研经 历代志下系列
错误回报,请联系comm[@]fhl.net