历代志下 34章19节 到 34章33节   背景资料  上一笔  下一笔
Chit段经文描写约西亚王听tio̍h律法册所记载ê内容后,heⁿh惊kah赶紧用忏悔ê心,积极去推动改革ê工作。并且派人去访问女先知户勒大,对tī chhōe-tio̍h律法册ê看法。然后,约西亚带领全体犹大ê领袖,ài大家重新kah上帝立约,决心beh遵守上帝律法册上ê记事去行。

发见「约」册ê时间,大约是tī主前622年左右,mā就是约西亚廿六岁hit年。有kóa圣经学者认为「约」册ê内容就是申命记第十二到廿七章,á是利未记第十七到廿六章。Koh khah重要ê是,约西亚是当tio̍h祭司、利未人kah所有其他人民宣读「约」册ê内容。

第19到21节,约西亚听tio̍h沙番念ê律法册,heⁿh惊kah赶紧拆裂衫裤表示忏悔,然后马上派人去求问上帝,希望koh khah清楚上帝会án-ne惩罚北国以色列,mā可能ē-sái犹大仝款面临上帝ê审判。

第22节,chiah-ê代表由希勒家祭司带领,in去求问一个女先知,名叫户勒大,kā tī圣殿发见了律法册ê事kā户勒大讲。

第23到28节,chit段经文是户勒大tùi上帝领受ê信息转告hō͘ chiah-ê约西亚ê代表,ài in tńg去kā上帝ê话讲清楚。Chit-ê信息ê内容就是耶路撒冷kah犹大人民因为弃sak上帝,致使上帝ê愤怒无法度止息。M̄-koh约西亚因为对上帝忠实,因为án-ne,上帝会tī伊往生chìn前,bē惩罚犹大。这表示上帝会tī约西亚安然地离开世间了后,chiah出手严厉惩罚犹大人民。

第29到30节,约西亚听tio̍h先知户勒大chit种信息后,并无停止改革信仰ê动作。伊召集所有ê犹大kah tòa tī耶路撒冷ê所有领袖,lóng聚集到圣殿,mā包括祭司、利未人,kah thang来ê人民,无论是甚么人,ài in lóng到圣殿注意听所发见ê约册。

第31到33节,约西亚khiā tī圣殿大柱边,向上帝立约,表示beh听从上帝ê话,一心一意遵行律法诫命,凡约册上所记载ê,lóng会切实遵行。伊mā tio̍h所有出席在场ê人,以及全国人民确实遵行chit项立约。就án-ne,tī伊活teh ê日子里,犹大人民确实án-ne做。Mā因为约西亚án-ne推动,hō͘耶路撒冷koh一pái成做「耶和华宗教」ê信仰中心。

重新查询 专卷研经 历代志下系列
错误回报,请联系comm[@]fhl.net