历代志下 31章1节 到 31章10节   背景资料  上一笔  下一笔
Chit章主要是tī说明犹大王希西家怎样提升利未人tī圣殿ê角色,尤其是为tio̍h beh hō͘祭司kah利未人「ē-tàng专心做上主律法所规定ê事」,伊要求所有人民kā祭司kah利未人「应得ê供奉」带来hō͘ in。所谓「应得ê供奉」,指ê是申命记第十四章22到29节所记载ê规定。结果人民奉献ê礼物特别ê chē,chē到有chhun。其实,chia teh强调in lóng kā「各种物件ê十分之一带来」,表示in已经有一段时间无敬拜上帝,当然mā bē记得该带jōa-chē ê量来奉献。Mā因为过去敬拜被疏忽了,致使祭司kah利未人无法度tùi人民敬拜ê时奉献ê所得供应生活ê需要。Taⁿ,希西家命hō͘人民一定会按照规定奉献,表示希西家teh改革上已经稳定了,人民chiah会注意敬拜ê事。

另外一方面,咱看tio̍h作者描述希西家之所以tī宗教改革ê事顶面ē-tàng成功,是因为伊「一心走chhōe上帝ê旨意而做」,这表示希西家确实是一位tī信仰上真敬虔ê君王。信仰ê事就是án-ne,tī上位ê人如果以敬虔ê心过信仰生活,人民就bē沈醉tī声色酒肉ê糜烂生活。反之,kui个社会ê伦理道德就会堕落,国家ê根基真容易就腐pháiⁿ。

Chit段经文是重新组织祭司kah利未人ê班次,thang hō͘圣殿ê祭祀礼仪ê事thang顺利进行。以色列人民mā听从希西家ê指导,kā祭司kah利未人该得ê份带来hō͘ in,帮助in thang专心tī圣殿事奉ê工作。

第1节,chia一开始就讲希西家带领犹大人民过完siōng重要ê Pôaⁿ过节后,参加过chit节期活动ê人必定lóng大受感动,因为án-ne,in就到各地城镇去,kā hiah-ê偶像神明ná亲像亚舍拉女神像、巴力ê神像等lóng拆毁,同时kā祭拜偶像神明ê祭坛mā摧毁。

第2到3节,希西家同时重新组织了祭司kah利未人ê服事班次,hō͘ in lóng有一定ê工作职责thang做,特别是摩西律法上所订定ê各种节期该有ê献祭礼仪,lóng一切按照规矩办理。这mā反应出in已经真久时间无án-ne做。

第4到7节,希西家mā吩咐tòa tī耶路撒冷ê居民,kā应该hō͘祭司kah利未人ê供奉带来,án-ne,祭司kah利未人就ē-tàng「专心做上主律法所规定ê事」,换句话讲,过去因为tī chit方面疏忽,致使祭司kah利未人为tio̍h生活就会忽略该有ê祭祀礼仪。人民lóng听希西家ê话,in kā「siōng好ê礼物」,包括五谷、酒、橄榄油、蜂蜜,kah其他农产品lóng带来,而且mā进行了十分一奉献hō͘上帝。Án-ne,奉献礼物之多,chē到「堆积如山」。Chiah-ê tī说明过去因为弃sak上帝,去拜偶像神明,chiah致使圣殿ê kah对上帝ê敬拜疏忽有荒废ê情景。Taⁿ tī希西家严厉推动改革之下,改变à。

第8到10节,因为希西家王推动改革信仰,hō͘大家lóng tńg来到上帝面前,mā因为án-ne,有上帝赐福,m̄-nā奉献够额,人民mā不缺乏。因上帝ê赐福永远够额他子民ê需要。

重新查询 专卷研经 历代志下系列
错误回报,请联系comm[@]fhl.net