历代志下 29章1节 到 29章17节   背景资料  上一笔  下一笔
Tùi第廿九章到三十二章lóng是记载犹大王希西家。伊ē-sái讲是犹大晚期siōng有希望复兴国家ê一位君王,mā是积极进行宗教信仰改革ê国王。Tī历代志á是列王记ê作者评语中lóng是非常bē-bái ê,作者用「效法先祖大卫王ê模样」(参考廿九:2),kah「无效法伊ê先祖大卫王ê好模样」(参考廿八:1)作比较,突显出希西家kah in老父亚哈斯之间ê对比。作者对希西家ê评语是用(1)「伊效法先祖大卫王ê模样,做上主认为对ê事」,来形容chit位君王ê施政方针。(2)并且讲伊死后,犹大国所有ê人民「lóng为伊举哀致敬」。有关希西家执政期间ê犹大国势发展情况,mā thang参考以赛亚书第三十六到三十九章。

对照列王记下第十八到二十章记载有关希西家执政ê记事,就会发见kah历代志记载ê资料有极大ê差别;列王记在内容上偏重tī希西家tī国政上ê事务,而tī历代志则偏重tī宗教改革方面ê描述,tī chit方面包括重新奉献圣殿、过Pôaⁿ过节、提升利未人ê地位等等。

值得注意ê是希西家执政共计廿九年,其中iáu包括伊bat向上帝祈求延长十五年ê岁月(参考列王记下二十:6)。Tī希西家执政ê期间,mā就是主前721年,乃是北国以色列被亚述帝国消灭,人民被俘虏四散tī各地寄居做奴隶,以及亚述帝国tùi外国引进真chē居民khiā起tī撒马利亚,甚至强迫北国以色列人民kah外族人通婚等等,chiah-ê事迹都无出现tī历代志内面。虽然讲历代志作者偏重南国犹大ê正统角色(伊认为犹大kiáⁿ孙chiah是延续雅各家族ê),m̄-koh对tī十二支派中ê九个支派被俘虏到外国去做奴隶,chhun落来无被俘虏去做奴隶ê,soah koh面临被迫kah异族通婚ê迫害,chiah-ni̍h重要ê事件却疏忽了,确实是件真oh想像ê事。

因为希西家ê老父约哈斯kā圣殿封闭,而且大量tī全国各地建造偶像祭坛,以及铸造偶像,致使国家差不多hō͘ 上帝惩罚到灭亡。因为án-ne,当希西家继承王位后,就积极展开清除chiah-ê错误ê宗教信仰态度。伊第一件所做ê事,就是kā祭司kah利未人召集tńg来到圣殿门口,chiù-chōa beh带领人民tńg来到上帝面前,ài in先洁净家己,然后根据摩西律法ê规定,进行洁净圣殿ê工作,伊tùi chia开始,beh重新洗荡犹大人民对上帝无忠实ê心灵。

第1到2节,这是历代志作者绍介犹大诸王ê一种笔调,就是先讲继承王位ê年龄,然后讲chit-ê王统治jōa-chē年,母亲是甚么人等等。Chia讲希西家「二十五岁ê时chūn作犹大王」,伊统治犹大共计「二十九年」。Siōng重要ê是伊「效法先组大卫ê模样,做上主认为对ê事」,chit句话已经说明希西家会带领犹大人民tńg来到上帝面前。Bē像伊ê老父亚哈斯hit种悖逆上帝。

第3到4节,希西家作犹大王是tī主前715到686年。伊tī登基做王ê第一个月,就召集了祭司kah利未人聚集到圣殿「东院」,这是teh指圣殿大门ê广场。对chiah-ê宗教领袖表达伊ê心愿。

第5到11节,chit段经文中,希西家对chiah-ê祭司kah利未代表讲出几点重要看法:一是所有祭司kah利未人一定tio̍h先洁净家己,然后kā圣殿ê污秽除掉。二是祖先做上帝看做邪恶ê事。三是不敬拜上帝,mā不开放圣殿hō͘人民敬拜(这是teh指家己ê老父亚哈斯)。四是上帝因为án-ne大怒而惩罚犹大人民。五是顶一代ê祖先因为án-nehō͘ 上帝惩罚死tī战场ê不计其数,而bó͘-kiáⁿ受掠伊去ê koh-khah chē等。Chiah-ê lóng teh表明希西家是一个真清楚实况kah原因ê君王,并无因为家己ê老父tī政策上有错误,就用白贼掩盖(khàm),却是坦承错误。这mā表示伊teh beh开始进行改革ê工作。

第12到14节,chia列出利未祭司kah利未族ê代表名单,每一个宗族派出两名代表,共计有十四名。

第15到17节,chiah-ê宗教领袖tńg去,召集家己宗族ê人进行洁净礼仪,先洁净家己,了后就进行洁净圣殿。Án-ne共计开了十五天ê时间,到à第十六天,就lóng kā圣殿「清除清气」,准备好势beh敬拜上帝。

重新查询 专卷研经 历代志下系列
错误回报,请联系comm[@]fhl.net