历代志下 28章1节 到 28章15节   背景资料  上一笔  下一笔
Chit章lóng是teh描述新ê犹大王亚哈斯执政ê情形。伊继承老父约坦留落来ê王位,统治犹大国大约是tī主前732到715年。

历代志作者teh绍介一位新ê王,lóng是先作结论,讲chit-ê王有无「做上主认为对ê事」,然续后落来是讲因为有做上主认为对ê事,所以上帝赐福chit-ê王kah伊所治理ê,hō͘伊国家富强,人民安居乐业。颠倒,若是chit-ê王做上帝看做邪恶ê事,上帝一定会受气,而且用chit-ê王、国家ê敌人来侵犯,因为he是上帝ê惩罚方式。Chit章讲亚哈斯「无效伊ê先组大卫王ê好模样,无做上主认为对ê事」,这表示亚哈斯拜偶像神明非常严重,而这tú好kah伊ê阿公、老父等人颠倒。

Chit段经文是描述犹大王亚哈斯执政了后,就弃sak了上帝,去拜偶像。上帝用叙利亚,以及北国以色列来侵犯犹大,hō͘犹大人民分别被掠到叙利亚kah撒马利亚去。M̄-koh有一位名叫「俄德」ê先知,伊得tio̍h上帝ê启示,去向北国以色列领袖,讲in bē-tàng俘掳家己ê同胞做奴隶。In因为án-ne听从先知俄德ê建言,kā所有受掠ê犹大囚犯送tńg去犹大地区。

第1到4节,chit段经文mā同时记载在列王纪下第十六章1到4节。

亚哈斯继位ê时,chiah二十岁。统治犹大十六年就往生,án-ne,伊只活了三十六岁而已。伊对拜偶像ê事非常热心,mā是犹大历代君王中,m̄-nā家己铸造偶像崇拜,koh khah严重ê,是伊家己ê kiáⁿ当做牲礼献祭hō͘偶像,而这是上帝所无法度容忍ê行为。

第5到6节,短短两节,记载上帝允准叙利亚来进攻犹大,结果phah败犹大,hō͘真chē犹大人民hông掠去大马士革。续落来,上帝koh允准北国以色列来出兵来侵犯犹大,仝款phah败亚哈斯kah伊ê军队,结果「tī一工之内」就有chē kah「十二万犹大ê精兵」被杀害,这是非常严重ê惨败。Kah过去伊ê祖先有真好ê国防武力相差真chē,原因是因为伊弃sak上帝。就亲像上帝ê奴仆对犹大王亚玛谢所讲ê,是上帝决定军队ê胜负(参考历代志下廿五:8)。亚哈斯就是因为拜偶像非常严重,远远弃sak上帝,mā上帝mā弃sak伊真远,结果当外族侵犯犹大ê时,就会失去上帝ê庇护,任人侵犯蹂躏犹大人民。

第7到8节,因为军队惨败tī北国以色列手下,犹大人民koh chē kah二十万人受掠,包括有妇cha-bó͘-kiáⁿ童在内,同时掠夺了犹大ê真chē财富当做战利品。Tī chit种混乱危kah之状况下,有一个以色列兵丁刣死亚哈斯ê kiáⁿ,mā刣死王宫总管kah宰相。

第9到11节,上帝ê奴仆先知俄德,伊是北国ê先知。伊看见北国以色列军队kā犹大人民当做俘掳带tńg来撒马利亚ê时,就去见in,传达上帝ê信息hō͘ chiah-ê领袖,警告in一定tio̍h马上kā所掳ê chiah-ê犹大人民,tháu放 tńg去,若无,一定会惹起上帝ê愤怒。因为南国犹大人民kah北国以色列人民lóng是兄弟姊妹,就不应该俘掳家己ê同胞当做奴隶。先知俄德特别强调一个点:犹大ê失败,是上帝beh藉tio̍h以色列kah叙利亚来惩罚in。M̄-koh并无表示以色列比犹大会好jōa-chē。

第12到15节,北国有四位领袖,知影了chit件事,mā认同先知俄德ê信息,联合起来反对军队俘掳犹大人民,beh赶紧kā in释放tńg去。In同时承认北国以色列人民并无比南国犹大人民好,mā仝款是犯罪严重。只是上帝先惩罚犹大罢à。Chiah-ê军人听chiah-ê话了后,就好款待chiah-ê俘掳,然后kā in遣送tńg去。

重新查询 专卷研经 历代志下系列
错误回报,请联系comm[@]fhl.net